Букмекеры назвалі Муракамі фаварытам Нобелеўскай прэміі

Букмекеры прызналі японскага пісьменніка Харукі Муракамі найбольш перспектыўным прэтэндэнтам на Нобелеўскую прэмію па літаратуры ў 2013 годзе.

Як паведамляецца на сайце брытанскай букмекерскай кампаніі Ladbrokes, стаўкі на поспех Муракамі прымаюцца ў суадносінах 3 да 1.

Таксама ў ліку фаварытаў значацца амерыканка Джойс Кэрал Оўтс (6 да 1), венгр Петэр Надаш (7 да 1), карэец Ко Ун (10 да 1) і канадка Эліс Мунро (12 да 1). З расейцаў у спіс Ladbrokes трапіў толькі паэт Яўген Еўтушэнка, яго шанцы ацэньваюцца як 100 да 1, піша Lenta.ru.

Муракамі не ўпершыню становіцца фаварытам па версіі букмекераў. Напрыклад, у 2012 годзе незадоўга да абвяшчэння лаўрэата тая ж Ladbrokes прымала стаўкі на поспех японца з каэфіцыентам 2 да 1. Тым не менш прэмію прысудзілі кітайскаму пісьменніку Мо Яню. Пазней, ужо ў 2013 годзе, Муракамі ўключылі ў шорт-ліст прэстыжнай Дублінскай літаратурнай прэміі, таксама вядомай як IMPAC, аднак лаўрэатам стаў ірландзец Кевін Бары.

Харукі Муракамі, якому цяпер 64 гады, з сучасных японскіх пісьменнікаў карыстаецца ў свеце найбольшай папулярнасцю. У ліку самых вядомых яго прац - раманы «Паляванне на авечак», «Дэнс, дэнс, дэнс», «Нарвежскі лес» і іншыя. Муракамі - лаўрэат Прэміі Франца Кафкі, Іерусалімскай прэміі і іншых літаратурных узнагарод.