Заводам Гомеля не хапае грошай на заробкі

Трывожныя весткі прыходзяць з заводу самаходных камбайнаў, ЗЛіНа і «Гомсельмаша».

Пра гэта паведаміў charter97.org чытач Віктар.

«Я працую на гомельскім заводзе самаходных камбайнаў. Нас у добраахвотна-прымусовым парадку прымушаюць пісаць заяву на адпачынак за свой кошт з 17 да 20 кастрычніка. Такая ж схема і на ЗЛіНе [завод ліцця і нармалей] і на Гомсельмашы. Папярэдзілі, што ў лістападзе таксама будзем пісаць заяву з 3 да 10. У папярэдніх месяцах мы таксама пісалі, але на нас не так моцна ціснулі. А цяпер кажуць, маўляў, ужо ўсе напісалі, увесь завод не будзе працаваць, і вас не пусцяць на прахадной. Афіцыйных загадаў няма. Вось так і працуем, а потым скажуць, маўляў, вас ніхто пісаць заяў не прымушаў», - піша ён.

Нагадаем, апошнім часам пачасціліся выпадкі пераходу буйных заводаў на чатырох- і нават на трохдзёнку, а таксама нявыплаты заробкаў.