Расея адмовілася пастаўляць Украіне газ напавер

Са слоў прэзідэнта РФ, 500 мільёнаў даляраў Украіна недаплаціла за першы квартал гэтага года.

Расея не мае намеру пастаўляць Украіне газ напавер, заявіў Уладзімір Пуцін паводле вынікаў перамоваў у Мілане, паведамляе РІА "Новости". "Напавер Расея ўжо нічога пастаўляць не будзе. Па-першае, патрэбная пэўная дысцыпліна спажыўца. Бо ўзровень збіральнасці, скажам, ва Украіне вельмі нізкі, значна ніжэйшы, чым у Расеі, ды і кошт, дастаткова нізкі", - растлумачыў прэзідэнт РФ.

"Другое: паглядзіце, як я ўжо казаў, у канцы мінулага года далі $3 млрд крэдыту. $1,4 млрд нашыя партнёры нам павінны за апошнія два месяцы мінулага года. Гэта бясспрэчная лічба. З нагоды паставак у мінулым годзе наогул ніхто ні пра што не спрачаецца, але грошай плаціць ніхто не хоча", - адзначыў Пуцін.

Паводле ягоных слоў, 500 мільёнаў даляраў недаплачана за першы квартал гэтага года, тады калі газ прадавалі па $268 за тысячу кубаметраў. "$500 млн усё роўна не заплацілі. За красавік, травень, чэрвень наогул нічога не плацілі - нуль. Проста спынілі плацяжы. Паводле нашых падлікаў агулам, гэта як мінімум $5,5 млрд, калі лічыць, што красавік, травень, чэрвень Украіна павінна была плаціць па $485”, - дадаў Пуцін.

У той жа час, паводле ягоных слоў, Расея гатова пералічыць кошт газу, пастаўленага ў другім квартале 2014 па кошце ў $385 за тысячу кубаметраў газу. Такім чынам, кошт газу пералічыла са зніжкай у $100 за тысячу кубаметраў, а агульная сума запазычанасці за пастаўлены газ знізіцца з $5,3 млрд да $4,5 млрд.

Нагадаем, паводле вынікаў двухбаковай сустрэчы з прэзідэнтам РФ Уладзімірам Пуціным у Мілане Пётр Парашэнка заявіў, што бакам не ўдалося дасягнуць практычнага выніку развязання газавага пытання. Парашэнка адзначыў пэўны прагрэс у перамовах, аднак заявіў, што "засталіся дэталі, якія яшчэ трэба абмеркаваць".