«Гродна Азот» і «Інтэграл» прададуць Расеі да канца года

Беларускія прадпрыемствы гатовыя далучыць да расейскіх ужо бліжэйшымі месяцамі.

Пра гэта паведаміў першы віцэ-прэм'ер Уладзімір Сямашка, адказваючы на пытанні журналістаў пасля сумеснага паседжання «палаты прадстаўнікоў» і «савета рэспублікі», паведамляе БелТА.

«Думаю, найбольш блізкія мы па «Гродна Азоту», - сказаў Уладзімір Сямашка. - З ягоных слоў, нядаўна адбылася ягоная сустрэча з адным з патэнцыйных партнёраў, падчас якой быў пазначаны шэраг праблемных пытанняў. Як адзначыў першы віцэ-прэм'ер, бакам удалося мінімізаваць некаторыя рознагалоссі. Рыхтуецца міжурадавае пагадненне. Плануецца, што наступная сустрэча, на якой будзе разгледжана пытанне аб рэалізацыі гэтага праекта, адбудзецца 14-15 лістапада. «Ёсць некаторыя пытанні, вырашаць якія - прэрагатыва ўрада Расейскай Федэрацыі», - растлумачыў Уладзімір Сямашка.

Дастаткова блізкія, з ягоных слоў, бакі і да прыняцця пастановы па праекце ААТ «Інтэграл».

Як паведамлялася, 29 ліпеня конкурсны адбор інвестараў для ўдзелу ў прыватызацыі акцый ААТ «Гродна Азот», якія належаць дзяржаве, не адбыўся праз адсутнасць заявак на ўдзел у ім. Раней чатыры расейскія кампаніі праяўлялі цікавасць да куплі блок-пакета акцый ААТ, у ліку якіх «Раснафта», «Газпрам» і «ЕўраХім».

Прадугледжана, што інвестар будзе абавязаны заключыць з дзяржавай інвестдамову аб будаўніцтве новага азотнага комплексу і забяспечыць фінансаванне праекта да 31 снежня 2019 з выкарыстаннем пры ягонай рэалізацыі дзеючай інфраструктуры «Гродна Азот». У выніку рэалізацыі праекта павінны быць пабудаваныя цэх аміяку магутнасцю 875 тыс. т у год, карбаміду (1190 тыс. т), грануляванага карбаміду і асноўная вадародная ўстаноўка (200 млн куб. м).

Што тычыцца «Інтэграла», то расейскі холдынг «Расэлектроніка» збіраецца інвеставаць у развіццё сумеснай вытворчасці мікраэлектронікі на беларускім прадпрыемстве. Сёлета красавіку было заяўлена, што на ўзгадненне бакоў бліжэйшым часам правядуць незалежную ацэнку рынкавага кошту акцый ААТ «Інтэграл». У выніку дадатковай эмісіі акцый доля «Расэлектроніка» ў статутным капітале «Інтэграла» складзе не менш за 51%. Для ацэнкі кошту акцый і комплексу неабходных ацэнак перад правядзеннем угоды прыцягнутая брытанская Аўдытарска-кансалтынгавая кампанія Ernst&Young.

У падпісаным мемарандуме аб узаемаразуменні разглядаецца магчымасць перадачы кантрольнага пакета акцый «Інтэграла» холдынгу «Расэлектроніка». Узамен расейскі бок гатовы інвеставаць у развіццё сумеснай вытворчасці мікраэлектронікі. Мемарандум таксама прадугледжвае ўзаемавыгаднае аб'яднанне навукова-тэхнічнага і вытворчага патэнцыялу і сумесную рэалізацыю інвестыцыйных праектаў, якія ажыццяўляюцца расейскім холдынгам у рамках мерапрыемстваў дзяржаўных праграм.