Спартсмен Дзевятоўскі, стаўшы «дэпутатам», пачаў вайну з журналістамі
30- 18.12.2014, 20:32
- 25,523
Папулізм і спекуляцыі ў СМІ пагражаюць стабільнасці грамадства, лічыць былы спартсмен, а цяпер "дэпутат" Вадзім Дзевятоўскі.
Сваё меркаванне намеснік старшыні камісіі "палаткі" аховы здароўя, фізічнай культуры, сямейнай і маладзёжнай палітыкі, старшыня Беларускай федэрацыі лёгкай атлетыкі Вадзім Дзевятоўскі выказаў у інтэрв'ю БелТА, каментуючы папраўкі ў закон "Аб сродках масавай інфармацыі", піша "Беларускі партызан".
"Я за аб'ектыўную і канструктыўную крытыку, якая дазваляе зірнуць на сябе з боку, даведацца меркавання самых прыдзірлівых экспертаў, адчуць зваротную сувязь. Але ў рэчаіснасці часта атрымліваецца так, што інфармацыя перагортваецца, з нязначных дэталяў робіцца падзея, і ў гэтай пене да сутнасці таго, што адбываецца, дакапацца не так проста", - сказаў Дзевятоўскі.
Кожны журналіст, блогер альбо чалавек, які піша каментары ў сетцы, павінны несці адказнасць за выкладзеную інфармацыю і памятаць, што слова - гэта таксама зброя, якая можа прынесці вялікую шкоду, унесці раскол і дысананс у грамадства, зганьбаваць людзей.
"Не ўсе гатовыя ісці і адстойваць праўду ў судзе, і дзяржава, выконваючы функцыю рэгулятара, павінная абараняць правы грамадзян", - сказаў Вадзім Дзевятоўскі. Карыстальнікі інтэрнэту (які становіцца галоўнай крыніцай інфармацыі) маюць права на якасны інфармацыйны прадукт і павінныя ведаць, каму прад'яўляць прэтэнзіі, калі гэта не так.
Вадзім Дзевятоўскі таксама адзначыў, што нельга падмяняць паняцце свабоды слова ўседазволенасцю. "Безадказнасць у любой сферы, а тым больш у інфармацыйным полі недапушчальная. Добрапрыстойнасць, сумленнасць, адкрытасць характарызуюць прафесійных журналістаў. Папулізм і спекуляцыі ў СМІ нясуць пагрозу стабільнасці ў грамадстве і могуць прывесці да самых жаласных наступстваў", - рэзюмаваў ён.
Нагадаем, палітычную кар'еру спартсмен стаў рабіць пасля таго, як неаднаразова быў замяшаны ў допінг-скандалах.
У 2000 годзе, напярэдадні Алімпіяды ў Сіднеі, Дзевятоўскі быў дыскваліфікаваны на два гады. На Алімпійскіх гульнях-2008 Міжнародны алімпійскі камітэт спачатку адабраў у яго сярэбраны медаль за ўжыванне допінгу, але затым вярнуў пасля вердыкту Спартыўнага арбітражнага суда ў Лазане, які знайшоў парушэнні ў працэдуры допінг-кантролю.