Лукашэнка: Цяпер галоўнае не дапусціць абрынання

Дыктатар мяркуе, што падзенне рубля на 30% - гэта не абрынанне.

Аляксандр Лукашэнка напярэдадні на нарадзе даручыў Нацбанку і ўраду прадугледзець шэраг мер спакойнага характару ў захаванні ЗВР. Пра гэта ён паведаміў сёння, адказваючы на пытанне карэспандэнта БелТА пры наведванні Дзяржаўнага камітэта судовых экспэртыз.

"Учора я даручыў прадугледзець шэраг мер спакойнага характару, якія мы можам зрабіць, каб не паліць залішне нашы рэзервы", - сказаў Лукашэнка.

"Я думаю, што Нацбанк і ўрад бліжэйшым часам будуць пастаянна інфармаваць насельніцтва, суб'екты гаспадарання аб мерах, якія прымаюцца", - дадаў ён.

Лукашэнка прывёў словы расейскага прэзідэнта Уладзіміра Пуціна, сказаныя напярэдадні, аб тым, што Нацыянальны банк "не павінен паліць валюту, рэзервы". "Так у іх паўтрыльёна было, праўда, цяпер каля 400 засталося. У іх велізарныя валютныя рэзервы былі ў суб'ектаў гаспадарання, газавікоў, нафтавікоў, якія працуюць на экспарт. Прыклад прыводзіў: патэлефанаваў, папрасіў, а ён кажа: так, у мяне ёсць $3 млрд, якія я магу выкінуць на рынак. Гэта значыць, і там мора было валюты, але яны не пайшлі на тое, каб спаліць золатавалютныя рэзервы, і адпусцілі рубель. Гэта прывяло вось да такога абрынання, вымушаныя былі падняць уліковую стаўку ", - сказаў ён.

Правадыр адзначыў, што ў Нацыянальнага банка ёсць рычагі і яны агульнавядомыя. "І мы будзем дзейнічаць у залежнасці ад абставін, - падкрэсліў ён. - Вы пабеглі ў абменнікі, попыт на валюту павялічыўся - цана валюты павялічылася. Ад абменнікаў сышлі ці пачалі прадаваць валюту, а не купляць - значыць, курс будзе паніжаны". Усе прылады вядомыя, дадаў ён.

Лукашэнка таксама заявіў, што цяпер галоўнае не дапусціць абрынання.

"І я не дарма сказаў, што ў гэтым выпадку, сітуацыя вельмі сур'ёзная, усё залежыць ад нашых людзей: будзе дэвальвацыя, не будзе, абрынем, не абрынем, абвалім, не абвалім. Гэта нашы людзі, я ў свой час пра гэта ўжо казаў: не бегайце як салапякі з гэтым рублём па абменніках і не абменьвайце на валюту, не гандлюйце, бо гэта будзе мець наступствы", - сказаў ён.

"Вядома, людзі не дурні, яны разумеюць, што Расея абрынулася, ва Украіне вы бачыце, якая сітуацыя. А гэта нашы асноўныя рынкі, куды мы прадавалі сваю прадукцыю і адкуль атрымлівалі валюту. Натуральна, пры такіх абвалах мы не маем тых аб'ёмаў валюты, якія былі ўчора. І яны пачынаюць неяк страхавацца. Людзі ж не разумеюць, а можа, не жадаюць разумець, што ў гэтага працэсу ёсць зваротны канец, які ўдарыць іх і нас па галаве - гэта павелічэнне попыту на валюту. А раз попыт павялічыўся, значыць, расце цана валюты", - адзначыў ён.

"Могуць мне сказаць: слухайце, а навошта нам гэты попыт і прапанова, давайце неяк валюту рэгуляваць адміністрацыйна. Можна адміністрацыйна. Але ўсё ж людзі хочуць, каб была свабода: ёсць у мяне лішнія рублі - я пайшоў і купіў валюту, ці мне патрэбна валюта - я яе купіў, ёсць у мяне валюта - пайду прадам і куплю рублі", - працягнуў беларускі правадыр.

З ягоных слоў, пры вольным рынкавым працэсе абмену валюты і ў іншых сектарах таксама павінна быць свабода. "Мы не можам рэгуляваць тут, а там адпускаць, даваць поўную свабоду. Мы не можам тут куплю-продаж зрабіць свабоднымі, а дзе-небудзь штосьці стрымліваць. Калі вольная - значыць вольная", - сказаў ён. "Але бываюць пікі. Вось Нацыянальны банк павінен за кошт гандлю рэзервамі гэтыя пікі згладжваць. Што мы і робім да гэтага часу. Але калі людзі наважылі перавесці частку сваіх сродкаў у валюту і павялічваюць попыт на яе, валюта будзе даражэць. Што ў нас так плаўна і адбывалася, без усялякіх абвалаў", - адзначыў ён.

"Для нас цяпер галоўнае - не дапусціць абрынання, не кінуцца ў вір за Расеяй, бо мы не ведаем, які там будзе рубель і г.д. Мы ведаем адно - што мы нясем вялікія страты ў сувязі з абрынаннем расейскага рубля, бо гэта наш асноўны рынак", - адзначыў Аляксандр Лукашэнка. Ён дадаў, што на Расею прыпадае 42% беларускага экспарту і каля 15-20% - на Украіну.

"Гэта значыць, сітуацыя няпростая. І, сказаўшы людзям пра тое, што мы не хочам, каб у нас абрынулася рэзка нацыянальная валюта, нам хацелася б прайсці гэты перыяд вось такім чынам спакойна. Пакуль у нас сіл для гэтага хапае", - падкрэсліў ён.