Кошты бензіну ў ЗША ўпалі да мінімуму з 2009 года

Падзенне коштаў бензіну ў ЗША звязана з патанненнем нафты на сусветных біржах.

Рознічныя кошты бензіну ў ЗША працягваюць зніжацца. За апошнія два тыдні яны знізіліся прыкладна на 25 цэнтаў і цяпер складаюць у сярэднім па краіне $2,47 за 1 галон (блізу 65 цэнтаў за 1 літр) аўтамабільнага паліва з самым нізкім актанавым лікам, паведамляе ТАСС.

Такім чынам, кошт бензіну ў ЗША ўпаў да мінімальнага ўзроўню з траўня 2009 года. З траўня гэтага года галон аўтамабільнага паліва патаннеў больш чым на $1,25.

Апытанне 2,5 тыс заправачных станцый, праведзенае службай Lundberg Survey, паказала, што самы дарагі бензін прадаецца цяпер у прыгарадзе Нью-Ёрка - на востраве Лонг-Айлэнд, дзе 1 галон нізкагатунковага паліва каштуе $2,82. Самы танны бензін можна знайсці ў горадзе Талса (штат Аклахома) - $2,06 за галон.

Са слоў аналітыкаў, падзенне коштаў бензіну ў ЗША беспасярэдне звязана з патанненнем нафты на сусветных біржах, якое адбываецца, перш за ўсё, праз зніжэнне попыту нафты. За апошнія два тыдні нафта на Нью-Йоркскай таварнай біржы патаннела на 14,2%. У мінулую пятніцу, калі адбыліся апошнія таргі, ф'ючэрсныя кантракты на пастаўкі нафты ў студзені 2015 заключаліся з разліку $57,13 за барэль.