Берасцейскага журналіста аштрафавалі на 6 мільёнаў

Суд Ленінскага раёна Берасця аштрафаваў на 40 базавых велічыняў (6 млн рублёў) берасцейскага журналіста Алеся Леўчука.

Яго абвінавачваюць у незаконным вырабе і распаўсюдзе прадукцыі СМІ (паводле часткі 2 артыкула 22.9 Кодэкса аб адміністрацыйных правапарушэннях), паведамляе БелаПАН.

Ляўчук мяркуе, што пастанова суда было прынятая загадзя. «Суддзя ніякія мае довады не разглядала, выразна вяла сваю лінію. Я азнаёміўся з матэрыяламі справы, там было выразна напісана: КДБ устаноўлена, што я працую на тэлеканал «Белсат», хоць гэта не было ніяк даведзена», - сказаў ён.

Са слоў журналіста, на судзе быў разгледжаны адказ з Міністэрства замежных спраў, у якім гаворыцца, што ў Леўчука няма акрэдытацыі ў якасці замежнага журналіста. Сам журналіст падаў у судзе пісьмовае пацверджанне, што ён з'яўляецца пазаштатным карэспандэнтам БелаПАН, а таксама рэдакцыйнае пасведчанне, аднак «гэта нават не разглядалася».

«Калі я ўбачыў, што гэта цырк і ніхто не збіраецца разглядаць справу, я адмовіўся даваць паказанні і адказваць на пытанні», - сказаў журналіст.

Ён мае намер абскардзіць пастанову ў абласным судзе.

Нагадаем, гэта ўжо 14-я пастанова, прынятая сёлета ў дачыненні да журналістаў паводле ч. 2 арт. 22.9 КаАП.