Яраш: Лукашэнка баіцца рэвалюцыі не менш, чым Пуцін

Лідар "Правага сектара" адказаў на абвінавачванні беларускага дыктатара.

Дэпутат Вярхоўнай Рады Украіны, лідар партыі "Правы сектар" Дзмітрый Яраш пракаментаваў выказванне Аляксандра Лукашэнкі. 17 кастрычніка падчас прэс-канферэнцыі для расейскіх рэгіянальных СМІ Лукашэнка заявіў, што экс-прэзідэнт Віктар Януковіч фінансаваў "Правы сектар", паведамляе "Еўрарадыё".

"Віктар Фёдаравіч (Януковіч) фінансаваў "Правы сектар". Бо ён супраць Юлі (Цімашэнкі) будзе", - сказаў Аляксандр Лукашэнка. І дадаў: "Стварыў сілу, якая яго і знішчыла".

Як вядома, "Правы сектар" - гэта аб'яднанне правых сіл ва Украіне, якое з'явілася ў канцы 2013 года і якое стала арганізаванай сілай Майдана. Цяпер гэта палітычная партыя.

Дзмітрый Яраш у інтэрв'ю часопісу "Esquire Ukraine" (№32 за снежань 2014 года) зняпраўдзіў сцвярджэнне Лукашэнкі. Ён падкрэсліў, што фінансаванне партыі празрыстае, а заяваў супраць Юліі Цімашэнкі "Правым сектарам" ніколі не прымалася.

Яраш таксама адзначыў, што многія беларусы "распавядаюць пра Лукашэнку". І ва ўкраінскага палітыка склалася ўражанне, што ён робіць такія дзіўныя заявы проста таму, што "баіцца рэвалюцыі не менш, чым Пуцін".