Узбекістан кланаваў «Твітэр»
4- 15.02.2014, 11:45
- 7,146
Ва Узбекістане з'явілася новая сацыяльная сетка, як дзве кроплі вады падобная на «Твітэр».
Стваральнікі мікраблогу Bamboo.uz прапаноўваюць жыхарам краіны пісаць у яго ўсё, пра што яны думаюць, чым займаюцца, што ў іх цікавага, што яны адчуваюць і аб чым мараць. Краіна, якой нязменна кіруе былы функцыянер КПСС, а цяпер прэзідэнт Іслам Карымаў, адрозніваецца жорсткім - нават паводле азіяцкіх мерак - кантролем інтэрнэту і прыгнётам свабоды слова агулам, паведамляе BBC.
У рэйтынгу свабоды інтэрнэту за 2013 год, складзеным няўрадавай арганізацыяй Freedom House, Узбекістан займае шостае месца з канца.
Горш, паводле версіі Freedom House, справы ідуць толькі ў Іране, Сірыі, Кітаі, Эфіопіі і на Кубе.
Bamboo.uz з'яўляецца практычна клонам «Твітэру» - у ягоны інтэрфейс уваходзяць сапраўды такія ж малюнкі карыстальнікаў, хэштэг, набор пошукавых і навігацыйных кнопак. І нават шрыфт, падобна, той жа самы.
Але ёсць і некалькі адрозненняў: напрыклад, паведамленні могуць утрымліваць 700 знакаў - роўна ў пяць разоў больш, чым у «Твітэры».
Але галоўная асаблівасць нацыянальнай сацыяльнай сеткі складаецца ў тым, што калі «Твітэр» створаны для ўсіх без выключэння, то ўзбекскі «Бамбук», як падкрэсліваюць распрацоўшчыкі, «выключна для жыхароў Узбекістана».
«Адна краіна - адна сетка», - такі яго дэвіз.
Інтэрнэт-карыстальнікі Узбекістана, дзе медыя-ландшафт жорстка рэгулюецца, успрынялі запрашэнне пісаць у новым мікраблогу ўсё, пра што думаецца, з вялікім скептыцызмам.
На гэтым тыдні міжнародная арганізацыя «Рэпарцёры без межаў» падвергла рэзкай крытыцы Узбекістан за строгую цэнзуру, заявіўшы, што ў цяперашні час там знаходзяцца пад вартай як мінімум дзесяць журналістаў і блогераў.