Прафесара Церашковіча звольнілі з ЕГУ

Кантракт фармальна ўкладаўся да верасня, але быў спынены датэрмінова.

Аб звальненні з Еўрапейскага гуманітарнага ўніверсітэта «Радыё Свабода» паведаміў старшыня Сената ВНУ прафесар Павел Церашковіч. Пастанову аб звальненні падпісаў выконваючы абавязкі рэктара ЕГУ Бярнардас Гайлюс.

Пастанова адобраная на падставе Статута ўніверсітэта і Працоўнага кодэкса Літоўскай Рэспублікі

Раней рэктар Анатоль Міхайлаў адмовіў кіраўніку сената ЕГУ Паўлу Церашковічу ў магчымасці падоўжыць працоўны кантракт. Павел Церашковіч быў адным са стваральнікаў платформы «За новы ЕГУ», якая крытыкавала адміністрацыю ВНУ.

«Гэта абсалютна заканамерны вынік недэмакратычнай, аўтарытарнай палітыкі рэктара, які прывык ва ўніверсітэце развязваць усё самастойна. Гэта адказ на паслядоўную дэмакратычную палітыку, якую праводзіў Сенат. Шчыра кажучы, я не бачу істотнай розніцы паміж рэктарам Міхайлавым і рэктарам Гарадзенскага ўніверсітэта, які пазбаўляе працы тых, хто яму не падабаецца. Я павінен з гэтымі дакументамі звярнуцца да адваката і падаць пазоў у суд. Буду прасіць разгледзець, наколькі абгрунтавана тое, што са мной не працягваюць кантракт. Тым больш, што гэта азначае, што я фактычна не дапушчаны да таго конкурсу, пра які так шмат распавядае наша адміністрацыя. Гэта азначае, што для тых, хто не падабаецца асабіста рэктару, ніякіх конкурсаў не будзе - проста будуць выкідаць з універсітэта», - пракаментаваў пастанову рэктарату Павел Церашковіч.