Лукашэнка: Для дэнамінацыі ўсё гатова

Новыя купюры будуць падобныя на еўра.

Для дэнамінацыі ў Беларусі ўсё гатова, у тым ліку аддрукаваныя новыя грашовыя знакі, але неабходна вычакаць зручны час.

Пра гэта заявіў Лукашэнка, размаўляючы сёння ў Баранавічах з прадстаўнікамі працоўнага калектыву ААТ «558 Авіяцыйны рамонтны завод», перадае «Інтэрфакс».

«Я ведаю, вы патрабуеце новую прыгожую валюту, таму што мільёны насіць у кашальках цяжка. Прыйдзе час - мы гэта зробім», - сказаў ён.

«Я шчыра казаў, што гэтая валюта ў нас надрукаваная адносна даўно. Прыгожая, на еўра падобная», - заўважыў кіраўнік.

Разам з тым, паводле яго слоў, у краіне яшчэ не наступіў момант, калі можна правесці дэнамінацыю нацыянальнай валюты. «Але для гэтага патрэбны момант, час, каб эканоміка пачала працаваць, каб была пэўная стабільнасць», - падкрэсліў ён.

Ён звярнуў увагу, што ўвядзенне ў абарот новых грашовых купюр з'яўляецца больш складаным працэсам, чым гэта ўяўляецца большасці насельніцтва. «У нас думаюць, што гэта тэхнічнае пытанне: гэтыя грошы заменім на іншыя, з коштамі разбярэмся - і на працягу года змяняецца валюта», - працягнуў Лукашэнка. «А народ у нас такі: мяняюць (грашовыя купюры) - значыць, трэба замяніць (беларускія рублі) на даляры і еўра», - адзначыў ён.

«Прыйдзе час, мы гэта зробім, але пакуль пацярпіце з гэтымі грашыма», - сказаў кіраўнік.

Новыя фантазіі Лукашэнкі: вырабляць самалёты і верталёты

Беларускі кіраўнік паставіў задачу па арганізацыі вытворчасці ў Беларусі самалётаў і верталётаў.

Па словах кіраўніка, займацца толькі мадэрнізацыяй і рамонтам існуючай тэхнікі бесперспектыўна, а таму неабходна рабіць крок наперад і самастойна асвойваць выпуск новай, запатрабаванай на рынках прадукцыі. «У Беларусі павінны вырабляцца і самалёты, і верталёты», - сказаў ён.

Як адзначыў Лукашэнка, для арганізацыі вытворчасці верталётаў ёсць пляцоўка ў Оршы. «Што такое вырабіць сёння ў Оршы верталёт? Не праблема, калі там будзе «Матор Січ» (украінская кампанія, якой належыць пакет акцый Аршанскага авіярамонтнага завода) з рухавіком. Рухавік ёсць, яшчэ купіць пару-тройку складаных прыбораў, якія, можа быць, і не трэба ў нас вырабляць. А ўсё астатняе - бяры і кляпай, рабі корпус», - сказаў ён.

«І другое - мы павінны вырабляць у сябе самалёт. Які - гэта ваша справа, але патрэбны для рынку, перш за ўсё, для Расеі», - падкрэсліў Лукашэнка.

Маючы зносіны з прадстаўнікамі працоўнага калектыву прадпрыемства, ён адзначыў адсутнасць неабходных тэмпаў руху па шляху развіцця прагрэсу. «Нам трэба ісці далей, ствараць самалёт, хай не цалкам свой, беларускі, але актыўна ўдзельнічаць у кааперацыі з Расеяй, іншымі дзяржавамі», - лічыць беларускі кіраўнік.