Ключавыя будынкі Луганска захопленыя дыверсантамі і баявікамі

Пад кантролем сепаратыстаў - абладміністрацыя, пракуратура, ТБ і аддзяленне МУС.

Аддзяленне Службы бяспекі Украіны ў Луганску было захоплена яшчэ ў пачатку красавіка, і ўвесь гэты час у ім знаходзіўся штаб прарасейскіх баявікоў.

Сёння а 15:00 каля дзвюх тысяч чалавек падышлі да будынка абласной адміністрацыі з расейскімі сцягамі, скандуючы «Расея, Расея». Многія былі ўзброеныя палкамі і дубінкамі, твары закрытыя маскамі або балаклавамі. Праз некаторы час яны пачалі штурмаваць цэнтральны ўваход і ў выніку натоўп уварваўся ў будынак. Ім ніхто не перашкаджаў, супрацоўнікаў міліцыі паблізу не было.

Праз некалькі гадзін быў заняты тэлерадыецэнтр. На тэрыторыю Луганскай абласной тэлерадыёкампаніі ўвайшлі каля 10 чалавек з аўтаматамі і выклікалі кіраўніцтва на перамовы, вынікам якіх стала прадастаўленне захопнікам прамога эфіру.

Пазней каля 700 баевікоў захапілі будынак пракуратуры Луганскай вобласці. Яны разбілі камянямі вокны, выбілі дзверы ў будынку і праз 10 хвілін зайшлі ў пракуратуру. Пасля гэтага захопнікі знялі дзяржаўны сцяг Украіны і спалілі яго.

Супраціву штурмоўцам не аказвалася, паколькі праваахоўнікаў на месцы здарэння не было, а некалькі супрацоўнікаў пракуратуры ў самым пачатку штурму пакінулі будынак.

Апошняй мэтай экстрэмістаў стала аддзяленне МУС. Баевікі пачалі штурмаваць яго ўвечары з ужываннем светлашумавых гранат і агнястрэльнай зброі. Каля паўтысячы названых асоб падышлі да будынка МУС з патрабаваннем адправіць у адстаўку начальніка УМВД Уладзіміра Гуслаўскага. Яны накіравалі ў будынак ініцыятыўную групу для перамоваў.

Праз некаторы час хтосьці з натоўпу кінуў гранату ў бок будынка МУС, у адказ таксама паляцелі светлашумавые гранаты. Пасля гэтага да месца сутыкненняў прыбылі каля 20 невядомых асобаў, узброеных аўтаматычнай зброяй. Яны адкрылі агонь у паветра, аднак некаторыя сталі страляць па вокнах будынка МУС. У выніку ён быў захоплены.

Каля будынка захопленай абладміністрацыі пачалі будаваць барыкады: пад'ехала машына з пяском, а таксама пад'ехалі аўтамабілі з драўлянымі палетамі і калючым дротам.

Органы пракуратуры ажыццяўляюць працэсуальнае кіраўніцтва ў крымінальным вытворчасці па факце захопу групай невядомых асобаў адміністрацыйнага будынка Луганскай абласной дзяржаўнай адміністрацыі і здзеку з дзяржаўнага сцяга Украіны.

Звесткі пра падзею ўнесеныя ў Адзіны рэестр дасудовых расследаванняў па арт. 341 (захоп дзяржаўных або грамадскіх будынкаў або збудаванняў), ч. 1 арт. 294 (масавыя беспарадкі) і ч. 1 арт. 338 (здзек з дзяржаўных сімвалаў) Крымінальнага кодэкса Украіны. Падчас штурму зламыснікі пашкодзілі маёмасць аблдзяржадміністрацыі, а пракраўшыся ў памяшканне, сарвалі з даху будынка сцяг Украіны.

Фота: EFE/EPA/Zurab Kurtsikidze