Freedom House: Горш, чым у Беларусі, толькі ва Узбекістане і Таджыкістане

Сёння абнародаваная новая справаздача міжнароднай арганізацыі Freedom House.

Яна змяшчае аналіз стану дэмакратыі і правоў чалавека ў 29 краінах Цэнтральнай і Усходняй Еўропы і Еўразіі, паведамляе «Радыё Свабода».

У дакладзе падкрэсліваецца ключавая роля Расеі ў зніжэнні ўзроўню дэмакратыі сярод краін постсавецкай сферы. Паводле даследавання Расея гуляе ролю ўзору для іншых краін рэгіёну.

Freedom House адзначае няўдачы ў дэмакратычным кіраванні не толькі ў краінах Еўразіі і на Балканах, але і ў посткамуністычнай Цэнтральнай Еўропе, дзе ў мінулым годзе было прыкметна захаванне карупцыі.

Freedom House вылучае сем параметраў, сярод якіх - стан грамадзянскай супольнасці, выбарчага працэсу, СМІ, узровень карупцыі і іншыя. Ацэнка вырабляецца па 7-бальнай шкале, 1 бал азначае найлепшае становішча, 7 - найгоршае.

Становішча ў Беларусі згодна з дакладам Freedom House, застаецца стабільна дрэнным 2 апошнія гады. Індэкс дэмакратыі, па дадзеных даследавання, склаў 6,71.

Беларусь разам з Расеяй, Таджыкістанам, Казахстанам, Азербайджанам, Туркменістанам і Узбекістанам трапіла ў групу кансалідаваных аўтарытарных рэжымаў. Паводле Freedom House, горш, чым у Беларусі, сітуацыя толькі ў Туркменістане і Узбекістане.

Паводле справаздачы, сярэдняя ацэнка дэмакратыі ў рэгіёне знізілася ў параўнанні з папярэднім годам, адмоўны ўплыў Расеі выказаўся ў прыняцці шэрагам краін Еўразіі законаў па ўзоры расейскіх. Адзначаецца рост карупцыі ў краінах Цэнтральнай і Усходняй Еўропы, што прывяло да зніжэння ацэнак дэмакратыі ў 5 з 10 краін Еўразвяза, якія былі аб'ектамі даследавання.