Лідару апазіцыі Венесуэлы пагражае 10 гадоў турмы

Суд у Венесуэле прыняў да разгляду справу лідара апазіцыі Леапольда Лопеса, які абвінавачваецца ў распальванні гвалту падчас антыўрадавых дэманстрацый.

На час следства палітык застанецца пад вартай. У выпадку прызнання вінаватым, яму пагражае да 10 гадоў зняволення, паведамляе BBC.

Адвакаты апазіцыянера настойваюць на тым, што яго пераследуюць паводле палітычных матываў.

Леапольда Лопес узначальваў калоны пратэстоўцаў у Каракасе, якія патрабавалі спыніць рост інфляцыі і злачыннасці і выпусціць раней арыштаваных актывістаў.

Акцыі пратэсту выліваліся ў сутыкненні з паліцыяй, якая ўжывала для разгону дэманстрацый слезацечны газ.

З лютага, калі ў Венесуэле пачалася хваля пратэстаў, ахвярамі сутыкненняў з паліцыяй сталі больш за 40 чалавек, сотні атрымалі раненні, дзясяткі апынуліся за кратамі.