Страляніна на мяжы Кыргызстана і Таджыкістана: ёсць загінулы
2- 10.07.2014, 14:10
- 11,304
Адзін чалавек загінуў, восем параненыя ў выніку страляніны на мяжы Таджыкістана і Кыргызстана.
Намеснік кіраўніка грамады таджыцкага анклава Ворух, дзе адбыўся інцыдэнт, Талібджон Махкамаў заявіў BBC, што страляў патруль кыргызскіх памежнікаў, а ўсе пацярпелыя з'яўляюцца цывільнымі жыхарамі таджыцкага паселішча Бедакі. Загінуў 35-гадовы Сафілідын Шаропаў.
Камэнтароў з боку Кыргызстана пакуль не было.
Параненых даставілі ў мясцовую лякарню Воруха, дзе ім надаецца першая медыцынская дапамога. Са слоў Махкамава, адправіць пацярпелых у раённую клініку Ісфары пакуль не выпадае, бо дарога, якая злучае анклаў з Таджыкістанам, перацятая.
Ворух - самы буйны з таджыцкіх анклаваў у Кіргізіі. Насельніцтва грамады складае блізу 35 тысяч чалавек.
Праз Ворух праходзіць адзіная дарога ў Лейлецкі раён Кыргызстана. Гэты стратэгічны шлях злучае яго з астатняй краінай, а таксама з'яўляецца адзінай дарогай для таджыкаў Воруха ў Таджыкістан.
На мінулым тыдні ў сталіцы Кыргызстана Бішкеку прайшло чарговае кола дзвюхстаронніх таджыцка-кыргызскіх перамоў аб дэлімітацыі і дэмаркацыі дзяржаўнай мяжы. Стораны заяўлялі аб дасягненні кампрамісу ў шэрагу спрэчных пытанняў.
Працягласць мяжы паміж Таджыкістанам і Кіргізіяй складае больш за 900 кіламэтраў. З іх 333 км дагэтуль не дэмаркаваныя. Лінія мяжы ўмоўная і часта праходзіць уздоўж дарог альбо праз населеныя пункты.
Адна з праблем у тым, што пры абазначэнні меж краіны карыстаюцца картамі, выпушчанымі ў розныя гады. Душанбэ намагае разгляду меж на падставе картаў 1924-1939 гадоў, а Бішкек - з улікам картаў 1958-1959 гадоў.