Расейцаў не любяць нідзе, акрамя Афрыкі, Грэцыі ды Кітая

Папулярнасць Расеі сярод жыхароў свету імкліва падае на фоне падзей ва Украіне.

Рэйтынг даверу да яе лідара Уладзіміра Пуціна скарачаецца ў разы. Пра гэта сведчаць вынікі даследавання Pew Research Center, праведзенага з 17 сакавіка да 5 чэрвеня гэтага года сярод жыхароў 44 краін. Усяго было апытана 48,643 тысяч чалавек, піша «Украінская праўда».

Апытанне паказала, што 43% людзей у свеце маюць негатыўнае меркаванне аб Расеі.

Тых, хто прытрымліваецца супрацьлеглага пункту гледжання, 34%.

У больш чым 6 з 10 жыхароў Польшчы, Нямеччыны, Італіі, Гішпаніі, Францыі, Вялікай Брытаніі і ЗША негатыўнае ўражанне пра Расею. Фактычна ва ўсіх, акрамя адной, з гэтых краін негатыўнае стаўленне ўдвая ўзмацніўся за апошні год.

Пры гэтым толькі грэкі вылучаюцца на фоне іншых еўрапейцаў, іх стаўленне да Расеі з'яўляецца пазітыўным - у 35% негатыўнае ўражанне пра Расею, 61% - пазітыўнае.

Стаўленне ўкраінцаў да Расеі таксама ашаламляльна змянілася. 6 з 10 украінцаў ставяцца да Расеі непрыязна, тады як у 2011 годзе такіх было толькі 11%.

Таксама Расея не карыстаецца папулярнасцю сярод жыхароў Блізкага Усходу. Тут больш за палову насельніцтва маюць негатыўнае стаўленне да яе. Тое ж самае можна сказаць і пра жыхароў Лацінскай Амерыкі. У Азіі стаўленне значна адрозніваецца ў залежнасці ад краіны і рэлігіі. Кітай - адна з нямногіх краін, дзе негатыўнае стаўленне да РФ наадварот скарацілася.

Афрыка найменш падобная да іншых рэгіёнаў у сваім стаўленні да Расеі. Тут большасць жыхароў за выключэннем Паўднёва-Афрыканскай Рэспублікі, даюць Расеі высокія ацэнкі, хоць многія людзі не выказваюць сваё меркаванне пра гэта.

Акрамя таго, большасць насельніцтва ў 25 з 44 краін не давяраюць дзеянням Пуціна на міжнароднай арэне.

Так, стаўленне да Пуціна з'яўляецца выключна негатыўным у ЗША і Еўропе.

8 з 10 амерыканцаў не давяраюць лідару Расеі, з чым згодныя большасць еўрапейцаў.

Больш за ўсё не давяраюць Пуціну жыхары Гішпаніі - 87%, Польшчы - 86%, Францыі - 85%, Егіпта - 83%, ЗША - 80%, Ярданіі - 79%, Італіі - 78%, затым ідуць Нямеччына - 77%, Турцыя - 75%, і ўжо пасля яе ідзе Украіна - 73%.

Пры гэтым больш чым 7 з 10 украінцаў выказваюць расчараванне дзеяннямі Пуціна.

Большасць насельніцтва на захадзе Украіны - 89% і 66% на ўсходзе выказваюць недавер расейскаму прэзідэнту.

Пры гэтым у Крыме такіх усяго 5%.

Разам з тым сярод выключна расейскамоўнага насельніцтва Усходу Украіны не давярае дзеянням Пуціна на міжнароднай арэне 51%, давяраюць - 43%.

На Блізкім Усходзе і ў Паўднёвай Амерыцы замежная палітыка Пуціна таксама не выклікае даверу.

Акрамя таго, 6 з 10 жыхароў Японіі і Паўднёвай Карэі не давяраюць Пуціну.

Негатыўнае стаўленне да Пуціна ў ЗША ўзрасло да 80%, што на 26% больш у параўнанні з 2012 годам (54%).

За апошнія два гады негатыў да Пуціна ўдвая вырас таксама ў Польшчы і Бразіліі.

Ва Украіне негатыўнае стаўленне да расейскага прэзідэнта вырасла з 2007 года на 40% і дасягнула 73%.