Расея прапануе беларусам адмовіцца ад Visa і MasterCard?
41- 2.07.2014, 15:45
- 20,372
Банк Расеі прапанаваў стварыць міжнацыянальную аплатную сістэму ў рамках Мытнага саюза.
Пра гэта паведаміў журналістам першы намеснік старшыні Банка Расеі Георгій Лунтоўскі, паведамляе ІТАР-ТАСС.
"Мы цяпер абмяркоўваем у рамках Мытнага саюза такую тэму, і было б цікава разам з калегамі з Казахстана і Беларусі рэалізаваць такі праект. Я думаю, ён будзе зрэалізаваны", - мяркуе Лунтоўскі.
Раней расейскія ўлады заявілі, што плануюць запусціць паўнавартасную нацыянальную аплатную сістэму (НАС) прыблізна праз паўтара года. Пастанову ствараць уласную НАС Расея прыняла пасля акупацыі Крыму і ўвядзення эканамічных санкцый з боку ЗША. Visa і MasterCard спынілі абслугоўванне карт некалькіх расейскіх банкаў. 5 траўня 2014 года Уладзімір Пуцін падпісаў закон аб нацыянальнай сістэме аплатных карт. Паводле прынятага закона, аператары аплатнай сістэмы, якія не з’яўляюцца нацыянальна значнымі, у тым ліку Visa і MasterCard, абавязаныя будуць уносіць на спецыяльны рахунак у Банку Расеі забеспячальны ўнёсак, роўны суме пераводаў грашовых сродкаў, праведзеных на тэрыторыі Расеі цягам двух дзён. Новыя правілы зрабілі працу найбуйнейшых аплатных сістэм у Расеі нерэнтабельнай.