Беларусь і Казахстан уцягваюць у гандлёвую вайну з Украінай

Еўразійская эканамічная камісія не выключае прымянення ахоўных мер на рынку ўсяго Мытнага саюза ў сувязі з падпісаннем Украінай пагаднення аб асацыяцыі з ЕЗ.

Пра гэта паведаміў сёння журналістам чалец Калегіі (міністр) ў гандлі ЕЭК Андрэй Сляпнёў, паведамляе БелТА.

"Пакуль у нас няма пастановы аб прымяненні такіх мер на траіх, але я не выключаю, што пасля такая пастанова можа ўзнікнуць па канкрэтных галінах і таварах пры наяўнасці адпаведных абставінаў і доказаў", - сказаў Андрэй Сляпнёў.

З ягоных слоў, ЕЭК можа прымяніць і іншыя меры, звязаныя з абаронай рынку Мытнага саюза. "Калі прамысловасць той ці іншай краіны адчувае сур'ёзнае негатыўнае ўздзеянне, звязанае са зніжэннем попыту, з ростам знешняй канкурэнцыі, зразумела, для яе існуе спакуса ўжываць дэмпінг і іншыя меры, звязаныя з тэхнічнымі нормамі, санітарнымі і фітасанітарнымі мерамі", - сказаў Андрэй Сляпнёў, дадаўшы, што з боку Украіны таксама магчымыя злоўжыванні ў галіне правілаў паходжання тавару і дастатковасці перапрацоўкі тавараў. Акрамя таго, ЕЭК трывожыць зніжэнне якасці кантролю тавараў на мяжы з Украінай.

Міністр нагадаў, што раней Расея атрымала права ў аднастароннім парадку, гэта значыць без удзелу астатніх краін ЕЭК, уводзіць меры ў абароне свайго рынку ў выпадку пагаршэння сітуацыі на ім праз падпісанне Украінай пагаднення аб асацыяцыі з Еўразвязам. У прыватнасці, гаворка ідзе пра магчымае прымяненне Расеяй дадатку 6 да Дамовы аб зоне свабоднага гандлю ў СНД. Гэты дадатак дазваляе ўжываць унутры зоны свабоднага гандлю не нулявыя стаўкі мытных збораў да краін, якія ўклалі такія пагадненні з трэцімі дзяржавамі і калі гэта прывяло да істотнага росту імпарту. Пры гэтым такія не нулявыя стаўкі не могуць быць больш высокімі за тыя, якія прыняла на сябе краіна ў рамках уваходжання ў СГА.