Расея забараніла кіраўніку Меджліса ўезд у Крым
15- 5.07.2014, 17:28
- 15,601
Магчыма, на 5 гадоў.
Самаабвешчаная крымская «ўлада» не пусціла на тэрыторыю паўвыспы кіраўніка Меджліса крымска-татарскага народа Рафата Чубарава.
Пра гэта паведамляе Крым.Рэаліі.
Паводле паведамлення, Чубараў вяртаўся з выязнога пасяджэння Меджліса ў Генічаску Херсонскай вобласці.
Самаабвешчаны «пракурор» Крыму Наталля Паклонская зачытала Чубараву пастанову аб забароне на ўезд.
У сваю чаргу, кіраўнік Меджліса традыцыйна запатрабаваў агучыць пастанову на дзяржаўнай крымска-татарскай мове. Паклонская адмовілася.
Карэспандэнты выдання налічылі ў месцы пункта пропуску «Чангар» праз так званую «мяжу», дзе затрымалі Чубарава, 6 аўтобусаў і 5 аўтазакаў.
Таксама назіраецца вялікая колькасць АМАПу і вайскоўцаў.
Паведамляецца, што ўсіх іншых чальцоў Меджліса прапусцілі праз «мяжу».
Паводле інфармацыі рупара крымскай «улады» «Крымінфарма», Расея забараніла Чубараву ўезд на сваю тэрыторыю тэрмінам на 5 гадоў.
Раней лідар крымска-татарскага народа Мустафа Джамілёў не выключыў, што «ўлады» рэспублікі могуць забараніць уезд у Крым Рафату Чубараву.