Праваабаронцу Алену Танкачову могуць пазбавіць віду на жыхарства ў Беларусі

У дачыненні да старшыні праўлення Цэнтра прававой трансфармацыі (Lawtrend) Алены Танкачовай распачатая працэдура пазбаўлення яе віду на жыхарства ў Беларусі.

Алена Танкачова з'яўляецца грамадзянкай Расейскай Федэрацыі, аднак каля 30 год пражывае ў Беларусі.

«23 верасня я атрымала апавяшчэнне аб пачатку працэдуры анулявання віду на жыхарства. Я раблю ўсе неабходныя юрыдычныя дзеянні, якія, магчыма, могуць паўплываць на сітуацыю», - паведаміла праваабаронца БелаПАН.

Ад якіх-небудзь дадатковых каментароў Танкачова адмовілася.

Цэнтр прававой трансфармацыі - некамерцыйная структура, мэтай якой з'яўляецца павышэнне прававой культуры, а таксама арганізацыя асветніцкай, аналітычнай і даследчай дзейнасці ў галіне права.