Вольга Завадская: Зняцце санкцый супраць Лукашэнкі - гэта злачынства

Еўрапейскі Звяз павінен прытрымлівацца логікі ў сваіх дзеяннях.

Пра гэта заявіла Вольга Завадзкая, маці выкрадзенага і забітага ў 2000 годзе тэлежурналіста Дзмітрыя Завадскага, паведамляе «Радыё Рацыя».

«Калі Еўразвяз здыме санкцыі з усіх тых, хто знаходзіцца ў спісе неўязных у дэмакратычныя краіны, у тым ліку і з падазраваных у цяжкіх злачынствах, то гэта будзе сапраўдным злачынствам, - падкрэсліла яна. - Для мяне палітыка ўжо даўно стала, і, высвятляецца, яно так і ёсць, бруднай справай. Кожная краіна мае для сябе пэўную мэту, уводзячы або скасоўваючы санкцыі, таму ўсе што робіцца з боку Еўрапейскага Звязу, яны робяць гэта для сябе, у любым выпадку, я так думаю. Калі будуць знятыя санкцыі, прынятыя раней, вядома, гэта будзе злачынства, бо ўсё ж такі павінна быць нейкая логіка ў іх дзеяннях».

Нагадаем, урад Беларусі не выканаў ніякіх рэкамендацый міжнародных арганізацый, якія тычацца правоў чалавека і вяршэнства закона, становішча з якімі толькі пагоршылася пасля жорсткіх дзеянняў уладаў зімой 2010 - увесну 2011 гадоў. Сітуацыя ў Беларусі перарасла ў зацяжны крызіс, дзе парушэнні правоў чалавека носяць «сістэмны і сістэматычны» характар, на вызначэнне Спецыяльнага дакладчыка ААН аб сітуацыі з правамі чалавека ў Беларусі. Гэта выклікана прыняццем шэрагу рэпрэсіўных законаў і прымяненнем усё больш рэпрэсіўных мер, якія руйнуюць асноўныя свабоды.

Не былі расследаваныя жорсткія дзеянні ўладаў пасля прэзідэнцкіх выбараў 19 снежня 2010 года, уключаючы паліцэйскі гвалт у дачыненні да дэманстрантаў, затрыманне больш за 700 чалавек, катаванні і бесчалавечнае абыходжанне з затрыманымі, несправядлівыя суды, у выніку якіх было асуджана больш за 40 чалавек, прызнаных палітычнымі вязнямі.

Урад Беларусі адмаўляецца ад супрацоўніцтва з міжнароднымі праваабарончымі механізмамі ў найбольш важных пытаннях правоў чалавека і не прызнае мандат Спецыяльнага дакладчыка ААН аб сітуацыі з правамі чалавека ў Беларусі.

Ніводны былы палітычны зняволены не быў рэабілітаваны.