Прадпрымальнікі пагражаюць адмовай ад выплаты падаткаў

Полацкія прадпрымальнікі трэці дзень спрабуюць адстаяць сваё права на працу.

У пятніцу на цэнтральным гарадскім рынку пачаліся масавыя праверкі падатковай службы, якія скончыліся канфіскацыяй тавару ў некалькіх дзясяткаў прадаўцоў, нагадвае «Радыё Рацыя».

Прадпрымальнікі кінулі працу і спрабавалі размаўляць з кіраўніцтвам горада. Але там ім адказалі, што падаткавікі не парушаюць закон, а тым, хто мяркуе, што ў іх канфіскавалі тавар незаконна, параілі звяртацца ў суд.

«Блізу 500 полацкіх прадпрымальнікаў могуць застацца без працы, - кажа старшыня Свабоднага прафсаюза полацкага аб'яднання «Шкловалакно» Віктар Стукаў. - Яны пра тое і кажуць: «А куды я пайду?» Моладзь яшчэ ў Расею, ва Украіну можа з'ехаць, там працаваць. А мы куды? Проста не ведаю, што рабіць. Ну, бралі б беларускі тавар, але ён у тры разы даражэй, яго ніхто не хоча купляць, ён зусім не канкурэнтны. Яго проста не прадаць, пагарыць усё - вось і ўся справа»

Сёння прадпрымальнікі збіраюць подпісы пад зваротам да ўлады. А таксама многія збіраюцца не плаціць падатак за лістапад і пачаць сапраўдны страйк.

Як стала вядома charter97.org, сёння раніцай прайшоў сход прадпрымальнікаў Полацка, у якім прынялі ўдзел блізу 200 чалавек. Актывіст ГА «Перспэктыва» прапанаваў пачаць збор подпісаў пад зваротам да мясцовых уладаў.

«Прадпрымальнікі горада Полацка, звяртаюцца да вас у сувязі з вострай і напружанай сітуацыяй, якая склалася, на рынках і гандлёвых аб'ектах горада, - гаворыцца ў ім. - Гэта можа паслужыць падставай для таго, што такія ж хваляванні могуць узнікнуць у іншых рэгіёнах краіны і з іншымі маштабамі, гэта значыць стаць перадумовай для сацыяльнага выбуху.

Справа ў тым, што ўжо трэці дзень запар прадпрымальнікі не могуць выйсці і пачаць нармальна працаваць, бо асцерагаюцца за свой тавар, які могуць канфіскаваць. Гэта адбылося з прычыны праверак накладных асобных ІП, вынікам якога з'явілася канфіскацыя тавараў».

У звароце прапануецца «неадкладна накласці мараторый на канфіскацыі і праверкі, з прычыны дзеяння Указа № 222 «Аб рэгуляванні прадпрымальніцкай дзейнасці і рэалізацыі тавараў індывідуальнымі прадпрымальнікамі ды іншымі фізічнымі асобамі», да тэрміну прыняцця пастановы ў суправаджальных дакументах, што задавальняюць усе зацікаўленыя бакі», а таксама «накласці мараторый на канфіскацыі і праверкі ў межах дзеяння тэхнічнага рэгламенту мытнага саюза ў дачыненні да ІП, якія займаюцца рознічным гандлем праз масавае не захаванне гэтых правілаў у краінах - гандлёвых партнёрах Мытнага саюза».

Нагадаем, 500 прадпрымальнікаў рынку ў Полацку апоўдні 16 кастрычнік пачалі страйкаваць у знак пратэсту супраць масавых праверак, якія праводзяць супрацоўнікі падатковай інспекцыі і АБЭЗ. Сустрэча з адміністрацыяй не дала вынікаў. У раённай падатковай інспекцыі прадпрымальнікаў папярэдзілі пра тое, што праверкі працягнуцца.