Прадпрымальнікі - уладам: Пасля 1 студзеня вы ўбачыце пустыя рынкі

Больш за 80% прадпрымальнікаў не збіраюцца не выходзіць на працу з Новага года.

З гэтага моманту ІП нельга будзе гандляваць таварам без сертыфікату якасці. Акрамя таго, таксама ўваходзіць у дзеянне забарона на продаж рэшткаў. Памочнік Лукашэнкі Кірыл Руды заявіў, што прадпрымальнікі не наладзілі дыялог з Міністэрствам эканомікі, піша onliner.by.

- З 1 студзеня тыя прадпрымальнікі, з якімі мы працуем, выявяцца ў сітуацыі, калі немагчыма будзе весці дзейнасць, - адзначыў кіраўнік РГА «Перспектыва» Анатоль Шумчанка на адкрыцці Сусветнага тыдня прадпрымальніцтва. - Мы сітуацыю не разгойдваем. Але калі пасля 1 студзеня вы ўбачыце, што ў казне не будзе падаткаў ад нас, убачыце пустыя рынкі і гандлёвыя цэнтры, хто будзе адказваць за тыя заканадаўчыя акты, праз якія мы фактычна цяпер знаходзімся на мяжы знішчэння?

Са словаў індывідуальных прадпрымальнікаў, існае заканадаўства практычна паралізуе іх працу. Паводле статыстыкі, у гандлі занятыя больш за 50 тысяч ІП. 80% з іх ужо збіраюцца не выходзіць на працу пасля Новага года.

- Больш за тое, сітуацыя з полацкімі «іпэшнікамі» паказала: нават калі ў цябе ёсць накладныя і сертыфікаты, то гэта не абарона ад канфіскацыі, - адзначыў ён. - Сёння адзін з пасылаў малога бізнэсу - не перашкаджаць. Даць магчымасць у гэты крызісны перыяд перажыць яго.

- Мы некалькі тыдняў, калі не месяцаў, выдаткавалі на абмеркаванне гэтай праблемы, якая ўзнікла яшчэ ў 2012 годзе, - парыраваў намеснік дырэктара дэпартамента аб прадпрымальніцтве Міністэрства эканомікі Пётр Арушаньянц. - А ўсё зводзіцца да таго, што трэба вярнуцца ў 90-я гады. Вось і ўсе прапановы. Але 90-х не будзе. Мы ідзем іншым шляхам.

- Што тычыцца сітуацыі з 1 студзеня і вашых заклікаў, у вас ёсць Міністэрства эканомікі, - скончыў дыскусію памочнік дыктатара ў эканамічных пытаннях. - Паверце мне, там шмат разважных людзей.

У размове з журналістамі Кірыл Руды адзначыў, што ў краіне няма негатыўнага стаўлення да ІП.

- Наадварот, мы спрабуем развязаць сітуацыю, неяк дапамагчы, - адзначыў ён. - Ніякай негатыўнай пазіцыі мы не выказвалі.

- А як вы самі ставіцеся да прадпрымальнікаў, якія гандлююць на рынку? - Задалі пытанне журналісты.

- Калі плацяць падаткі, то хай гандлююць, - выказаў сваю пазіцыю Кірыл Руды.

Нагадаем, 500 прадпрымальнікаў рынку ў Полацку апоўдні 16 кастрычніка пачалі страйкаваць на знак пратэсту супраць масавых праверак, якія праводзяць супрацоўнікі падатковай інспекцыі і АБЭЗ. У раённай падатковай інспекцыі прадпрымальнікаў папярэдзілі пра тое, што праверкі будуць прадаўжацца. Таксама ўлады сталі патрабаваць ад прадпрымальнікаў спецыяльныя сертыфікаты на свой тавар, але так як аптовыя базы ў Расеі, дзе ў асноўным і затаварваюцца беларусы, працуюць без сертыфікатаў, у малога бізнэсу з'явіліся складанасці.