Жыхары «вёскі навукоўцаў» у Лошыцы пратэстуюць супраць зносу
4- 25.11.2015, 15:37
- 10,931
Жыхары «вёскі навукоўцаў» у мікрараёне Лошыца падалі скаргу ў раённую пракуратуру на дзеянні адміністрацыі Ленінскага раёна.
Ініцыятыўная група жыхароў «вёскі навукоўцаў» у мікрараёне Лошыца падала скаргу ў раённую пракуратуру на дзеянні адміністрацыі Ленінскага раёна Менска, паведаміў БелаПАН са спасылкай на каардынатара кампаніі «Генплан - для менчукоў!» Дзяніса Кобрусева.
Паводле ягоных слоў, падставай для скаргі стала адмова раённай адміністрацыі ўключаць прадстаўнікоў ініцыятыўнай групы ў склад камісіі для правядзення грамадскага абмеркавання «Унясенне змяненняў у горадабудаўнічы праект дэталёвага планавання жылога раёна Лошыца».
Жыхары двойчы, 4 і 9 лістапада, падавалі звароты аб уключэнні сваіх прадстаўнікоў у склад камісіі. Адміністрацыя Ленінскага раёна двойчы адмаўлялася.
Грамадскае абмеркаванне «Унясенне змяненняў у горадабудаўнічы праект дэталёвага планавання жылога раёна Лошыца» праходзіць з 2 лістапада да 26 лістапада. Як патлумачыў Кобрусеў, раней дэталёвым планам меркавалася захаванне «вёскі навукоўцаў», новы план прадугледжвае яе знос. Жыхары ўзялі актыўны ўдзел у грамадскім абмеркаванні карэкціроўкі Генеральнага плана Менска і накіравалі зварот у Менгарвыканкам за подпісам 60 чалавек з патрабаваннем захоўваць прыватную забудову.
Як адзначыў Кобрусеў, гісторыя завулка Лошыцкага (раней вуліцы Мічурына) цесна звязаная з гісторыяй Лошыцкай сядзібы. Да пачатку 20 стагоддзя сядзіба Любанскага была не толькі адным з цэнтраў свецкага і інтэлектуальнага жыцця Менскай губерні, але і мела адну з самых вядомых і эфектыўных гаспадарак, а ўладальнік сядзібы з'яўляўся актыўным чальцом Менскага сельскагаспадарчага таварыства.
У 1925 году менавіта тут было адкрыта Беларускае аддзяленне Усесаюзнага інстытута прыкладной батанікі ды новых культур - першая ў рэспубліцы спецыялізаваная ўстанова ў галіне пладаводства.
Сярод цяперашніх жыхароў «вёскі навукоўцаў» ужо трэцяе пакаленне навукоўцаў-біёлагаў, кандыдаты навук у галіне хіміі, фізікі, эканомікі, галоўныя інжынеры-праграмісты буйных кампаній, выкладчыкі вядучых ВНУ Менска, лаўрэаты Дзяржаўнай прэміі БССР, прэмій прэзідэнта Беларусі, у тым ліку і для маладых таленавітых навукоўцаў, спецыялісты ў іншых кірунках.