Беларусь у аўтсайдарах паводле тэмпаў эканамічнага росту нават сярод краін СНД

Горш толькі ва Украіне, эканоміка якой пакутуе ад вайсковага канфлікту на Данбасе.

Паводле звестак Статкамітэта СНД, агулам эканоміка некаторых краін адчувае сябе нядрэнна. Напрыклад, у Арменіі ў студзені-кастрычніку 2015 ВУП вырас на 4%, у Кыргызстане - на 4,8%, а ў Таджыкістане - на 6,4%, піша «Салiдарнасць».

Горш за ўсё паводле тэмпаў эканамічнага росту справы ідуць ва Украіне, дзе ВУП знізіўся на 7% і ў Беларусі - са спадам на 3,9%. Нават у Расеі, якая знаходзіцца пад дзеяннем эканамічных санкцый і перажывае цяжкасці ў сувязі з падзеннем коштаў нафты, падзенне было не такое істотнае - 3,7%.

Яшчэ паводле аднаго важнага паказчыку - інвестыцый у асноўны капітал Беларусь і зусім паказала найгоршы вынік сярод краін СНД. Калі ва Украіне, эканоміка якой пакутуе ад вайсковага канфлікту на Данбасе, інвестыцыі ў асноўны капітал знізіліся на 9,2, то ў Беларусі адбылося абрынанне на 14,8%!

Таксама Беларусь знаходзіцца ў аўтсайдарах сярод краін СНД паводле тэмпаў росту коштаў.