Дэвальвацыя або абмежаванні на валютным рынку?

Нацбанку хутка зноў давядзецца зрабіць выбар.

Паводле папярэдніх звестак Нацбанка, на 1 лютага золатавалютныя рэзервы Беларусі ў вызначэнні ССРД склалі $4724,7 млн, зменшыўшыся за студзень на $ 334,4 млн.

Нацбанк у сваім каментары, як звычайна, спісаў зніжэнне ЗВР на неабходнасць пагашэння ўрадам і Нацбанкам замежных і ўнутраных абавязанняў у замежнай валюце, піша газета «Беларусы і рынак».

Пры гэтым падтрыманню ЗВР спрыялі паступленні ад збірання экспартных пошлін на нафтапрадукты, размяшчэнне валютных аблігацый Мінфіна, а таксама павелічэнне кошту золата на міжнародным рынку каштоўных металаў, растлумачылі ў Нацбанку, пры гэтым ні словам не згадаўшы аб дэвальвацыі, якая адбылася ў студзені.

Між тым скарачэнне рэзерваў у студзені прадэманстравала поўную неэфектыўнасць уведзенага ў снежні валютнага збору і відавочную недастатковасць студзеньскай дэвальвацыі. Зрэшты, калі б рэзервы апусціліся ў студзені на тую ж велічыню, што і ў снежні, - 760 млн. даляраў ЗША, то Беларусь бы ўжо да 1 лютага ўвайшла ў крызісны графік 2011 года. Тады ЗВР у вызначэнні МВФ складалі на 1 лютага 4343,0 млн даляраў ЗША, знізіўшыся за студзень на 687,7 млн. USD.

У 2011 годзе пасля гэтага пачалося імклівае падзенне рэзерваў, і да пачатку красавіка яны апусціліся ніжэй за 4 млрд. даляраў. Датуль валютны рынак у краіне быў ужо мёртвы.

Пры гэтым выплаты паводле замежных абавязкаў былі значна ніжэйшыя, чым сёння. Сёлета мы плацім паводле некалькіх замежных запазычанасцяў штомесяц, і ў лютым-сакавіку чакаюцца значныя выплаты, уключаючы апошні плацеж на карысць МВФ і чарговы плацеж у крэдыце АКФ ЕўрАзЭС (абодва плацяжы ў сакавіку).

Так што з улікам выплат можна прагназаваць далейшае падзенне ЗВР, на якія можа зноў пачаць ціснуць павышаны попыт на валюту з боку фізічных асоб. Бо, як тлумачыў на прэс-канферэнцыі 29 студзеня Аляксандр Лукашэнка, фінансавы рынак вельмі адчувальны да псіхалагічных фактараў. І падзенне ЗВР ніжэй за псіхалагічна важную адзнаку 5 млрд. USD можа справакаваць чарговую скупку валюты насельніцтвам.

Калі бліжэйшым часам (гаворка можа ісці аб тыднях) Беларусь не зможа прыцягнуць сродкі на папаўненне ЗВР, Нацбанку вельмі хутка зноў давядзецца выбіраць з двух бед: альбо далейшая дэвальвацыя, альбо абмежаванні на валютным рынку, якія хутка прывядуць да множнасці курсаў.

Фота: bymedia.net