Лукашэнка просіць у Масквы 2,5 мільярда даляраў

Улады Беларусі запыталі ва ўрада Расеі фінансавую падтрымку на 2015 год сумай у 2,5 млрд даляраў.

Пра гэта распавялі TUT.by некалькі інфармаваных крыніц.

На выходных Аляксандр Лукашэнка сустракаўся з Уладзімірам Пуціным у Сочы і абмяркоўваў пытанні развіцця інтэграцыйных працэсаў, у тым ліку ў рамках "саюзнай дзяржавы", ЕАЭС.

"Цяпер абмяркоўваецца магчымасць розных формаў [фінансавай] дапамогі з боку ўрада Расеі. Гэта могуць быць як крэдыты ад урада РФ, так і буйных расейскіх дзяржбанкаў. У агульнай складанасці падтрымка можа скласці 2,5 млрд даляраў", - распавёў суразмоўца. "Плюс да ўсяго беларускія прадпрыемствы могуць атрымаць істотныя прывілеі доступу на расейскі рынак. Сёння, нягледзячы на дэклараваную адзіную эканамічную прастору, існуюць пэўныя бар'еры доступу на рынак РФ", - дадаў ён.

Паводле звестак газеты "Беларусы і рынак", "гаворка ідзе пра доўгія і кароткія грошы, агульная заяўленая сума перавышае 2 млрд даляраў".

Крыніца паведаміла, што ў цяперашні час урад Беларусі рыхтуе праграму сумесных з Расеяй антыкрызісных захадаў у пераадоленні праблем у эканоміцы.

Фінальную версію плануецца разгледзець і ўзгадніць на пасяджэнні Вышэйшага дзяржсавету Саюзнай дзяржавы Беларусі і Расеі 3 сакавіка.

Аб магчымай фінансавай падтрымцы з боку Расеі гаварыў на вялікай прэс-канферэнцыі 29 студзеня Аляксандр Лукашэнка. "Нам не хацелася б яшчэ крэдытаў. Але я маю цвёрдыя дамоўленасці з прэзідэнтам і прэм'ер-міністрам [Расеі], калі нам будзе вельмі цяжка, то Расея плячо падставіць", - запэўніў дыктатар, дадаўшы, што беларуская эканоміка з'яўляецца сёння "часткай расейскай эканомікі".

Неўзабаве міністр фінансаў РФ Антон Сілуанаў пацвердзіў, што Расея ў выпадку крайняй неабходнасці разгледзіць магчымасць надання фінансавай дапамогі Беларусі, эканоміка якой "цесна звязаная" з расейскай. "Цяпер мы вывучаем сітуацыю разам з нашымі беларускімі калегамі. Мы аналізуем усе фактары, якія ўздзейнічаюць на эканамічную сітуацыю ў абедзвюх краінах, прынамсі, санкцыі і падзенне коштаў нафты. У цяперашні час мы вядзем перамовы", - адзначыў Сілуанаў.

Беларусі ў гэтым годзе неабходна выплаціць амаль 4 млрд даляраў у замежных абавязаннях. Пры гэтым золатавалютныя рэзервы краіны марнеюць. За студзень яны «ўсохлі» яшчэ на 335 млн даляраў - да 4,7 млрд даляраў.

У Мінфіне Беларусі адмовіліся ад каментароў.