Парашэнка: Я еду ў Менск, каб патрабаваць міру без якіх-небудзь умоў

Украіна патрабуе спыніць агонь, вывесці замежныя войскі і закрыць мяжу.

Пра гэта прэзідэнт Украіны Пётр Парашэнка заявіў падчас наведвання Краматорску, які 10 лютага абстралялі баевікі, паведамляе ягоная прэс-служба.

«Мы патрабуем міру без якіх-небудзь умоў. Мы патрабуем спынення агню, вывядзення замежных войскаў, закрыцця мяжы. Ім няма чаго тут рабіць. У нас няма ніякага канфлікту. Мы знойдзем кампраміс унутры краіны. Мы павінны абараніць свет, абараніць спакой горада Краматорска, павінны абараніць Украіну. І менавіта таму я еду ў Менск, каб неадкладна, без якіх-небудзь умоў спыніць агонь і пачаць палітычны дыялог. Мы самі разбярэмся», - падкрэсліў кіраўнік дзяржавы.

Пры аглядзе разбуранага дома ў цэнтры горада, у які трапіў набой сістэмы «Смерч», у выніку чаго пацярпелі чатыры сям'і, прэзідэнту былі пададзеныя рэшткі ракет і наступствы іх разбуральнага дзеяння.

«Гэта довады прымянення касетных боепрыпасаў супраць грамадзянскага насельніцтва горада Краматорска, у самым ягоным цэнтры. У мяне ў руках элемент касетных боепрыпасаў «Смерч», радыус прымянення якога - да 90 км. Нелюдзі выкарыстоўваюць супраць грамадзянскага насельніцтва касетныя боепрыпасы. Гэтыя довады будуць выкарыстаныя, у тым ліку і мной, у Менску і ў Радзе Еўрапейскага Звязу», - падкрэсліў ён.