Прадпрымальнікам Берасця распавялі, што такое салідарнасць

На рынках Берасця распаўсюдзілі ўлёткі, што заклікалі прадпрымальнікаў змагацца за свае правы.

Акцыю правялі актывісты грамадзянскай кампаніі «Еўрапейская Беларусь»

«Улёткі раздаваліся на ўсіх буйных рынках горада і ў іншых людных месцах. Усяго іх было распаўсюджана блізу 2 тысяч, - распавялі charter97.org удзельнікі акцыі. - З 1 сакавіка ў сілу ўваходзяць указы, якія, фактычна робяць немагчымым працу ІП. Многія прадпрымальнікі закрываюць свой бізнэс, іншыя рыхтуюцца да акцыяў пратэсту. Заклік да яднання і барацьбы за свае правы, як ніколі актуальны ў гэтай сітуацыі».

Ва ўлётцы быў надрукаваны артыкул аднаго з лідараў прадпрымальніцкага руху Іллі Дабратвора з заклікам да салідарнасці. «Пакуль кожны будзе толькі за сябе - пераменаў не будзе. Салідарнасць - гэта святое», - гаворыцца ў ёй.

Нагадаем, Форум індывідуальных прадпрымальнікаў, які адбыўся напярэдадні ў Менску, не развязаў галоўнай задачы, якая стаяла перад ягонымі ўдзельнікамі - адтэрмінаваць ўваходжанне ў дзеянне ўказа Лукашэнкі №222, які абавязвае мець з 1 сакавіка суправаджальныя дакументы на кожную адзінку тавару. Гандляваць без належных суправаджальных дакументаў праз тыдзень будзе забаронена. У выпадку парушэнняў прадпрымальнікаў будуць штрафаваць на 9 мільёнаў, а тавар будзе канфіскоўвацца. Ужо цяпер праходзяць масавыя стыхійныя праверкі і канфіскацыі.

Прадстаўнікі галіны канстатуюць, што ў выніку тысячы прадпрымальнікаў будуць вымушаныя спыніць дзейнасць, так як аптовыя базы ў Расеі, дзе ў асноўным і затаварваюцца беларусы, працуюць без сертыфікатаў.