Міністарка працы: Дэкрэт аб «дармаедах» - часовыя захады

Улады працуюць над увядзеннем спецыяльных электронных картак.

Падчас эфіру перадачы «Трэба разабрацца» міністарка працы і сацыяльнай абароны Марыяна Шчоткіна распавяла аб дэкрэце пра дармаедства, піша «Комсомольская правда в Беларуси».

«Абмяркоўвалі на форумах, прынялі такую форму. Казалі: давайце ўсіх загонім працаваць. Але нельга прымусіць чалавека працаваць. Пайшлі іншым шляхам. Давайце тады ўдзельнічаць у фінансаванні».

«Калі гэты дакумэнт складалі, казалі пра тое, што гаворка ідзе пра працаздольных грамадзянах у працаздольным узросце, якія нясуць пэўны сацыяльны абавязак(...). Унесці ў гэтае ж грамадства, у якім яны жывуць, пэўную дапамогу для тых катэгорый, якія маюць патрэбу ў гэтай дапамозе, і захаваць сацыяльныя льготы на тым узроўні, які ёсць сёння. А яны вельмі немаленькія, дарэчы».

«Дарэчы, у дэкрэце напісана, што гэта часовы дакумэнт. Цяпер ідзе вельмі вялікая падрыхтоўчая праца да таго, каб у краіне дзейнічала так званая БІСРС - беларуская інтэграваная сэрвісна-разліковая сістэма, якая прадугледжвае, што ў кожнага чалавека будзе такая беларуская электронная картка. (...) Уся інфармацыя аб тых ільготах, якія належаць пэўнаму чалавеку, будзе знаходзіцца на гэтым электронным носьбіце».

...Аб пенсіях

«Часта паўстае пытанне аб тым, што хацелася б, каб пенсіі былі вышэйшыя. Прапанавалі: ёсць добраахвотнае пенсійнае страхаванне, ты можаш назапасіць сваю пенсію. Мы рэкамендавалі прадпрыемствам(...), што вы таксама можаце для таго, каб затрымаць высокакваліфікаваных спецыялістаў, прапанаваць ім такі бонус. Гэта значыць, застрахаваць іх за кошт прыбытку на дадатковае пенсійнае страхаванне. Што цікава. Там, дзе ўзяло цяжар прадпрыемства, ахвотных шмат і гэта дзейнічае. Там, дзе сам чалавек - практычна не развіваецца гэты від назапашвання пенсіі.(...) Калі ты сёння атрымліваеш высокую заплату, ты не выстаўляй потым прэтэнзій, чаму ў салідарнай сістэме атрымліваецца невысокая пенсія. Калі ласка: вось ты маеш такую магчымасць, фармуй сабе дадатковую пенсію».

...Аб багатых людзях

«Сёння адзін зарабляе шмат, другі зарабляе менш, у аднаго жонка працуе, у другога не працуе. Дзяржава выплачвае ўсім аднолькавую дапамогу для догляду дзяцей(...). Ніводнага разу наогул не прагучала аб тым, што хто-небудзь прыйшоў і сказаў: вы ведаеце, я зарабляю вельмі шмат, мне не патрэбная такая падтрымка з боку дзяржавы, дайце яе тым, каму гэта больш трэба, чым мне. Гэта значыць, браць ахвочыя ўсе».

...Аб беспрацоўных на джыпах

Я была ў адным раёне, не буду казаць у якім. Мне старшыня райвыканкама кажа: «Мар'яна Акіндзінаўна, хочаце, я вам скажу партрэт беспрацоўнага?» Гэта памежная тэрыторыя. Я кажу: добра. Ён кажа: «Малады, прыстроены, на джыпе. Дакладна беспрацоўны».

...Аб скарачэннях

«Калі ўзяць сітуацыю за студзень-люты, паводле скарачэння штатаў звольнілі толькі тысячу чалавек, гэта значыць там, дзе аптымізаваная колькасць».

«Мы ўжо сустракаліся і з генеральнымі дырэктарамі, і з дырэктарамі, і з людзьмі з заводаў. Бо адбываецца што: гэта з'ява часовая. (...) Перш за ўсё, сёння захоўваюць калектывы не таму, што куды ж яны пойдуць. (...) Сёння ёсць варыянты працаўладкавання. Але гэта кадры, гэта калектыў, гэта кваліфікаваныя кадры, кожны на сваім месцы. (...) Але калі мы сёння страцім кваліфікаваных работнікаў і страцім свой калектыў, давядзецца зноў рабіць калектыў гэты».