Вярхоўная Рада заклікала Пуціна вызваліць украінскіх закладнікаў

Украінскія дэпутаты патрабуюць ад расейскага прэзідэнта выконваць Менскія пагадненні.

Парламентарыі прынялі пастанову аб звароце Вярхоўнай Рады да прэзідэнта Расейскай Федэрацыі Уладзіміра Пуціна аб неабходнасці захавання комплексу захадаў у выкананні Менскіх пагадненняў і вызваленні незаконна ўтрымоўваных у РФ народнага дэпутата Надзеі Саўчанкі і ўсіх іншых закладнікаў, паведамляе «Карэспандэнт».

Адпаведную пастанову падтрымалі 249 дэпутатаў. Радыкальная партыя адмовілася падтрымаць пастанову, назваўшы яе «найніжэйшым прашэннем» да Пуціна.

Так, у дакуменце дэпутаты Украіны заклікаюць расейскага прэзідэнта «вызваліць з-за кратаў украінскую лётчыцу, народнага дэпутат Украіны Надзею Саўчанку, а таксама грамадзян Украіны на тэрыторыі Расейскай Федэрацыі, якія там незаконна ўтрымоўваюцца, у тым ліку ўкраінскага рэжысёра Алега Сянцова, якія былі захопленыя ў палон на тэрыторыі Украіны, перавезеныя на тэрыторыю Расейскай Федэрацыі і насуперак іх волі незаконна там утрымоўваюцца».

Украінскі парламент таксама просіць Пуціна выкарыстоўваць увесь свой уплыў на незаконныя ўзброеныя фармаванні, які дзейнічаюць у асобных раёнах Данецкай і Луганскай абласцей Украіны з мэтай неадкладна вызваліць закладнікаў і асоб, якія ўтрымліваюцца незаконна, паводле прынцыпу «ўсіх на ўсіх».

Нагадаем, раней прэзідэнт Украіны Пятро Парашэнка ў тэлефоннай размове заклікаў генеральнага сакратара ААН Пан Гі Муна спрыяць вызваленню ўкраінскай лётчыцы Надзеі Саўчанкі, якая знаходзіцца ў расейскім СІЗА, а таксама ўсіх закладнікаў. Басманны раённы суд Масквы адмовіў абаронцам Надзеі Саўчанкі ў задавальненні скаргі спыніць крымінальную справу ў дачыненні да ўкраінскай лётчыцы.