Лаўроў заявіў, што Саўчанку могуць амніставаць пасля пастановы суда

Да лётчыцы могуць ужыць палажэнні Менскіх пагадненняў аб амністыі, але спачатку справа павінна дайсці да суда.

Кіраўнік МЗС РФ Сяргей Лаўроў не выключае, што да ўкраінскай лётчыцы і народнага дэпутата Надзеі Саўчанкі могуць быць ужытыя палажэнні Менскіх пагадненняў аб амністыі, але спачатку справа павінна дайсці да суда.

Як паведамляе ТАСС, у інтэрв'ю тром расейскім радыёстанцыям Лаўроў заявіў: «Наконт абмену «ўсіх на ўсіх» - яна не закладніца, яна арыштаваная паводле падазрэння ў злачынствах. Тут можа ісці гаворка аб задзейнічанні іншай часткі Менскіх пагадненняў, дзе гаворыцца аб амністыі ўсіх датычных да падзеяў на «паўднёвым усходзе». Але каб амніставаць чалавека, трэба спачатку давесці да суда, і суд павінен прыняць пастанову».

«Калі суд вызначыць, што яна вінаватая, то тады, напэўна, яна будзе падпадаць пад амністыю, калі я магу цяпер так патлумачыць Менскія дамоўленасці», - адзначыў Лаўроў.

Нагадаем, Саўчанка была выкрадзеная баевікамі на Данбасе летам 2014 года, а затым яе перавезлі ў Расею, дзе абвінавацілі ў датычнасці да гібелі расейскіх журналістаў. Паводле звестак абароны, яна не магла быць датычнай да гібелі журналістаў, бо трапіла ў палон яшчэ да іх смерці.

26 кастрычніка 2014 г на пазачарговых выбарах Саўчанка была абраная народным дэпутатам паводле спісу партыі «Бацькаўшчына». Вярхоўная Рада дэлегавала яе ў ПАРЕ.

28 студзеня Парламенцкая асамблея Рады Еўропы пастанавіла вызваліць Саўчанку цягам 24 гадзін і вярнуць яе ва Украіну ці перадаць трэцяму баку.

Адвакат Саўчанкі Марк Фейгін паведаміў, што ў пятніцу, 25 красавіка, ягонай падабароннай выстаўленае афіцыйнае абвінавачванне ў незаконным перасячэнні мяжы.