Працаваць 4 гадзіны ў тыдзень - і не патрапіць у «дармаеды»?

Журналісты знайшлі яшчэ некалькі спосабаў пазбегнуць новага падатку.

Дэкрэт №3 фармальна патрабуе працаваць больш за 183 дзён, але працаваць можна па-рознаму. Грамадзянін з'яўляецца «ўдзельнікам дзяржаўнага фінансавання» незалежна ад таго, працуе ён поўны дзень, на палову стаўкі або нават на 0,1 стаўкі. Галоўнае, каб працоўная кніжка была задзейнічаная, паведамляе «Еўрарадыё».

Ці можа працоўны працаваць 4 гадзіны ў тыдзень паводле дамовы паміж работнікам і наймальнікам і не быць плацельшчыкам збору?

У прэс-службе Міністэрства працы і сацыяльнай абароны кажуць, што можа: велічыня працоўнай стаўкі ніякім чынам не ўплывае на статус. Калі чалавек працуе - ён ужо не «дармаед».

«Грамадзянін прызнаецца ўдзельнікам фінансавання дзяржаўных выдаткаў у перыяд работы паводле працоўнай дамовы (кантракту). Гэта значыць тут не сказана ні аб велічыні стаўкі, ні аб велічыні максімальных і мінімальных заробкаў», - тлумачаць у міністэрстве.

Яшчэ адным спосабам збавення ад статусу «дармаед» можа быць афіцыйны догляд за інвалідам першай групы або састарэлым чалавекам, якому больш за 80 гадоў. Калі за гэта дзяржава выплачвае фінансавую дапамогу, гэта афіцыйна ператварае чалавека ва ўдзельніка дзяржаўнага фінансавання.

Дарэчы, фінансавая дапамога прызначаецца ў суме 100%, а пры вядзенні адначасовага догляду за двума і больш непрацаздольнымі грамадзянамі - у суме 120% найбольшай велічыні бюджэту пражытачнага мінімуму ў сярэднім на душу насельніцтва. На гэты момант гэта 1 428 100 рублёў.

Супрацоўніца Фонду сацыяльнай абароны насельніцтва Кастрычніцкага раёна Менска кажа, што для атрымання гэтай дапамогі трэба не прымаць ніякіх іншых выплат (не працаваць, не быць ІП, не быць на ўліку ў цэнтры занятасці, не быць студэнтам), не быць пенсіянерам і не атрымоўваць выплат ад «Белдзяржстраха».

«Але гэтая праца не ўвойдзе ў страхавы стаж. Яна залічыцца толькі ў агульны стаж. Таму што ў страхавы стаж уваходзяць толькі тыя месяцы, калі выплачваліся страхавыя ўнёскі. А страхавыя ўзносы з гэтай фінансавай дапамогі не выплачваюцца», - кажуць у Кастрычніцкім ФСАН.