Алег Волчак: У Беларусь услед за Расеяй могуць вярнуць культ Сталіна і НКУС

З'яўленне міністра МУС у гарнітуры савецкага міліцыянта-карніка выклікала шок у многіх беларусаў.

Падчас параду 9 траўня міністр унутраных спраў Ігар Шуневіч вызначыўся формай рабоча-сялянскай міліцыі НКУС СССР. У прэс-службе міністра ад каментароў charter97.org адмаўляюцца, аднак кіраўнік «Прававой дапамогі насельніцтву», былы следчы пракуратуры Алег Волчак мяркуе, што такія пераапрананні могуць сведчыць пра тое, што насельніцтва палохаюць і нагадваюць аб тым, што НКУС усё яшчэ можна адрадзіць.

- Гэта ўсё вельмі дзіўна. Незразумела, як можа дзейны афіцэр надзець такую форму на такім урачыстым мерапрыемстве, прысвечаным 9 траўня. Нават слоў няма выказаць абурэнне. Гэта нават не этычна, улічваючы тое, што траціна беларусаў пацярпела ад НКУС - гэта мы ўсе ведаем, прынамсі, і мае сваякі. Гэта магло абразіць і іншых людзей.

Парад - гэта ж не здымкі і не рэканструкцыя гістарычнай падзеі, калі надзяваеш такое абмундзіраванне дзеля нейкага персанажа, сцэнічнага дзеяння. Не выключана, што дрэнна спрацавалі ягоныя піяршчыкі - бо хтосьці яму такую ідэю падказаў! Ці гэта нейкая падстава, каб паказаць, што ў людзей ва ўладзе - поўная адсутнасць сувязі з рэальным часам. Спачатку я ўвогуле думаў, што гэта жарт такі, пакуль мне фота не паказалі. Можа, зрабілі гэта адмыслова, каб Шуневіча баяліся, для гэтага пераапранулі ў прадстаўніка НКУС. Тым больш, у кіраўніцтве МУС, Генпракуратуры і СК ёсць людзі, якія застаюцца ў цені, але ўмеюць пісьменна падставіць. А тым больш, міністр - не проста фігура начальніка, гэта палітычная пасада. Трэба думаць над кожным словам, над кожным рухам, над кожным гарнітурам, - мяркуе праваабаронца.

- Як ўспрынялі такі маскарад вашы знаёмыя супрацоўнікі міліцыі?

- Губляецца аўтарытэт усёй структуры МУС, калі яе кіраўнік выходзіць вось у такім выглядзе. Гэта не робіць яго больш прывабным, і наогул, ідэя сцэнарыстаў парада не вельмі ўдалая. У розных колах такое дзеянне выклікала неадназначную ацэнку. Сярод маіх калегаў у МУС - абурэнне, нават свае не могуць зразумець сэнс гэтага пераапранання. Калі б ён выйшаў у прыгожым, стыльным чорным гарнітуры - гэта было б нешта. Тым больш, я ведаю, што П'ер Кардэн шые гарнітуры для беларускіх дыпламатаў. Чаму гэтым нельга пашыць, каб усе глядзеліся цывілізавана? Але вось так палохаць... Хоць, улічваючы тое, што ў Расеі Сталіна вывешваюць дагэтуль на плакаты, то не выключана, што ў Беларусі таксама будзе адраджэнне культу НКУС.

- Нават так?

- Ну а чаму не? Дзяржынскі да гэтага часу стаіць. Калінін - таксама. Людзі, якія праводзілі сур'ёзныя рэпрэсіі. Ніхто іх не асудзіў, ніхто іх справы не разгледзеў.

- Ды і не мяняюцца іх метады. Дарэчы, менавіта Ігар Шуневіч вызначыўся тым, што ладзіў «гутаркі» палітвязням у турме КДБ, прынамсі, галоўнай рэдактарцы charter97.org Наталлі Радзінай, былому кандыдату ў прэзідэнты Андрэю Саннікаву і журналістцы Ірыне Халіп.

- Наш цэнтр цяпер як раз працуе з Еўразвязам па рэформе МУС і пракуратуры. Адным з пунктаў як раз з’яўляецца тое, што ў будучай міліцыі і пракуратуры на кіроўных пасадах павінны быць грамадзянскія асобы, у тым ліку - жанчыны. Беларусам трэба хутчэй сыходзіць ад гэтых вайсковых маршаў, формаў, тым больш, калі яшчэ гісторыя аб НКУС да канца не раскрытая. Мы бачым, як Расея спалохалася, калі адкрыліся архівы КДБ ва Украіне. Паверце, калі ў нас адкрыюцца, то мала нікому не падасца. Ні цяперашнім кіраўнікам, ні тым, хто цяпер мяркуе, што ягоны дзед быў героем і ветэранам КДБ. Усе пабачаць, што ўсё гэта «геройства» было на крыві.