Спякота вернецца ў Беларусь у другой палове тыдня
- 8.06.2015, 15:29
- 6,367
З чацвярга надвор'е пачне мяняцца, паўночныя вятры памяняюцца на паўднёвыя.
Пра гэта БелТА паведаміў начальнік службы гідраметэаралагічных прагнозаў Рэспубліканскага цэнтра гідраметэаралогіі, кантролю радыеактыўнага забруджвання і маніторынгу навакольнага асяроддзя Дзмітрый Рабаў.
"Гарачае надвор'е вернецца ў Беларусь у другой палове тыдня. А пакуль чакаецца цёплае надвор'е, якое будзе вызначаць абсяг павышанага атмасфернага ціску, сфармаваны ў свежым Балтыйскім паветры", - адзначыў ён.
У аўторак будзе пераважна без ападкаў, толькі на поўдні адаб'ецца ўплыў малаактыўнага франтальнага падзелу, дзе і пройдуць у некаторых раёнах невялікія кароткачасовыя дажджы. Тэмпература паветра ўначы складзе 5-11 градусаў вышэй за нуль, у паўднёвых раёнах - плюс 12-15. Удзень будзе 18-23 градусы цяпла, у Берасцейскай і Гомельскай абласцях паветра прагрэецца да плюс 25.
Без ападкаў прагназуецца ў сераду. Тэмпература паветра ўначы складзе ад плюс 5 на поўначы да плюс 13 на поўдні. Удзень будзе 16-22 градусы вышэй за нуль, на поўдні паветра прагрэецца да 23-24 градусаў.
"З чацвярга надвор'е пачне мяняцца, паўночныя вятры памяняюцца на паўднёвыя, і з паўднёвага захаду краіны будуць паступаць больш цёплыя паветраныя масы. Слупкі тэрмометраў стануць ісці ўгору", - растлумачыў Дзмітрый Рабаў. У чацвер ападкаў не чакаецца. Тэмпература паветра ўначы складзе 3-10 градусаў цяпла. Удзень будзе ад плюс 19 на паўночным усходзе да плюс 27 на паўднёвым захадзе.
У некаторых раёнах у пятніцу, збольшага на паўднёвым захадзе, чакаюцца кароткачасовыя дажджы, навальніцы. Тэмпература паветра ўначы складзе 5-12 градусаў вышэй за нуль, на паўднёвым захадзе да плюс 14. Удзень будзе 23-29 градусаў цяпла.
У канцы тыдня ў большасці раёнаў ўсталюецца гарачае надвор'е. У суботу месцам, пераважна на паўночным захадзе, пройдуць кароткачасовыя дажджы, навальніцы. Тэмпература паветра ўначы складзе 10-17 градусаў вышэй за нуль, удзень будзе плюс 25-32.
У нядзелю праз Беларусь пройдзе малаактыўны атмасферны фронт, месцам чакаюцца кароткачасовыя дажджы, навальніцы. Тэмпература паветра ўначы складзе 13-20 градусаў вышэй за нуль. Удзень чакаецца плюс 25-32, на паўночным захадзе будзе халадней, там тэмпература складзе 21-24 градусы цяпла.
Дзмітрый Рабаў папярэдзіў, што расце пажарная небяспека. "У сувязі з тым, што ў большасці раёнаў краіны ўсталявалася сухое надвор'е, паказчык пажарнай небяспекі пакрысе расце. З чаканай нястачай ападкаў на наступным тыднi небяспека ўзнікнення пажараў моцна ўзрасце. Асноўная прычына лясных пажараў - неасцярожнае абыходжанне з агнём у лесе і на прылеглых да лесу тэрыторыях", - адзначыў начальнік службы гідраметэаралагічных прагнозаў.