11 чэрвеня 2023, Нядзеля, 2:49
Сім сім, Хартыя 97!
Рубрыкі

За прапанову каранаваць Лукашэнку - штраф 4,5 мільёна

33

Мікалай Лусто, які праводзіў адзіночны пікет каля будынка Цэнтрвыбаркама ў Менску, атрымаў штраф 25 базавых адзінак.

Суд Маскоўскага раёна Менска прызнаў актывіста грамадскага аб'яднання «Альтэрнатыва» і сябра партыі БНФ Мікалая Лусто вінаватым ва ўдзеле ў несанкцыянаваным пікеце і пакараў штрафам 25 базавых адзінак, паведамляе «Радыё Свабода».

ФОТА: Алега Корбана

Прысуд вынесла суддзя Таццяна Матыль.

Мікалай Лусто прызнаў віну часткова. Актывіст не адмаўляў, што выйшаў на адзіночны пікет, але кажа, што кіраваўся Канстытуцыяй, якая гарантуе свабоду выказвання меркаванняў і права на мірныя сходы.

Суд улічыў, што ў Мікалая Лусто абодва бацькі інваліды. Ягоны бацька трапіў у лякарню, маці засталася адна, а яна з цяжкасцю перасоўваецца па кватэры. Суд даў магчымасць сябрам Лусто, прысутным на працэсе, з'ездзіць да ягоных бацькоў і прывезці ў суд дакументы, якія пацвярджаюць інваліднасць.

Трымалі Мікалая Лусто асобна ад іншых затрыманых. Яго ахоўвалі АМАПаўцы ў цывільным. Журналістам мець стасункі з ім не давалі.

24 ліпеня ў Менску каля будынка Цэнтрвыбаркама быў затрыманы актывіст грамадскага аб'яднання «Альтэрнатыва» Мікалай Лусто, які праводзіў адзіночны пікет. У руках актывіст трымаў плакат «Навошта выбіраць? Трэба каранаваць! Не - выбарам!». Са слоў сведак, акцыя працягвалася менш за хвіліну. Да актывіста адразу падышоў ахоўнік і адвёў яго ў будынак ЦВК.