Анджэй Дуда: NATO павінна адказаць тым, хто мае імперскія замашкі

Пашырэнне NATO на ўсход павінна суправаджацца пашырэннем інфраструктуры Альянсу.

Інакш патэнцыйны агрэсар стала будзе тэставаць арганізацыю на трываласць.

Пра гэта падчас адкрыцця 25-га Эканамічнага форуму ў Крыніцы-Здруй на поўдні Польшчы заявіў прэзідэнт РП Анджэй Дуда, паведамляе Укрінформ.

"Калі NATO пашырыцца на новыя краіны, то трэба, каб інфраструктура таксама прасунулася (на ўсход - рэд.). NATO - гэта абаронны інстытут, і не можа сабе дазволіць прабел у прасторы бяспекі. Калі будуць прабелы, то будзе жаданне праверыць арганізацыю на трываласць", - заявіў Дуда.

Ён падкрэсліў, што сёння Расея тэстуе на трываласць Эстонію, рэгулярна парушаючы яе тэрытарыяльную прастору.

"NATO павінна спакойна даць адказ тым, хто мае імперскія замашкі..." - канстатаваў Дуда.

Нагадаем, эканамічны форум у Крыніцы-Здруй будзе прадаўжацца да 10 верасня.