21 лiпеня 2024, Нядзеля, 13:09
Падтрымайце
сайт
Сім сім,
Хартыя 97!
Рубрыкі

Форум ІП: Сітуацыя надзвычай напаленая

68

Антыкрызісны форум прадпрымальнікаў сабраў блізу паўтары тысячы прадстаўнікоў малога бізнэсу.

На форум з'ехаліся прадпрымальнікі з Менска, Гомеля, Берасця, Віцебска, Магілёва, Барысава, Жлобіна, Слуцка, Полацка, Наваполацка, Оршы, Слоніма, Маладзечна, Быхава, Бабруйска, Светлагорска, Асіповічаў, Мазыра, Добруша, Ліды, Чэрвеня, Заслаўя, Ваўкавыска, піша БелаПАН.

Арганізатарам форуму выступіла рэспубліканскае грамадскае аб'яднанне «Перспектыва». Адкрываючы сустрэчу, старшыня «Перспектывы» Анатоль Шумчанка распавёў пра «гісторыю барацьбы ўлады з прадпрымальнікамі», пачынаючы з 2000 года. Ён адзначыў, што ў сярэдзіне 2000-х гадоў былі прыклады, калі дзяржаве і прадстаўнікам малога бізнэсу ўдавалася дамовіцца і дасягнуць кампраміснага варыянту аб умовах працы ІП. «Гэта значыць, гэтага можна дамагчыся шляхам кампрамісу, дыялогу, у рамках дамоўленасці бакоў», - сказаў Шумчанка.

Ён падкрэсліў, што беларускія прадпрымальнікі выступаюць не супраць «сертыфікацыі тавараў, цывілізаванага гандлю». «Мы супраць таго, каб без нашага ўдзелу прымалі ў дачыненні да нас законы тыя, хто з'яўляецца наўпроставым канкурэнтам нашаму бізнэсу. Калі за вас прымае пастанову канкурэнт, які спіць і бачыць, што вас няма, гэта называецца лабіяванне інтарэсаў», - заявіў лідар «Перспектывы».

Удзельнікі антыкрызіснага форуму прадпрымальнікаў, які праходзіць 11 студзеня ў сталічным гатэлі «Беларусь», запатрабавалі ад Лукашэнкі ўмяшацца ў сітуацыю з праблемамі малога бізнэсу.

Выступаючы на форуме, прадпрымальніца з Гомеля Святлана Калачова заявіла, што ў Беларусі «паўстала вельмі вялікая праблема». Яна папрасіла Лукашэнку скасаваць указ №222, які накіраваны на «выраўноўванне ўмоў буйнога і малога бізнэсу». «Але як можна параўноўваць сеткі з трыццаццю гіпермаркетамі і ІП з гандлёвай плошчай у два квадратныя метры?» - Пацікавілася Калачова.

Яна нагадала, што аптовыя пастаўшчыкі ў Расеі дагэтуль не выдаюць беларускім ІП дакументы, неабходныя для легальнага гандлю згодна з указам №222. У той жа час тавары беларускай вытворчасці «не могуць запоўніць нішу», вызваленую прадукцыяй, якая раней прывозілася прадпрымальнікамі з-за мяжы.

Са словаў Калачовай, з пачатку 2016 «80% прадпрымальнікаў не адпачывалі на вакацыях», як заяўлялі некаторыя чыноўнікі, а юрыдычна не змаглі легалізаваць свой бізнэс праз невыканальныя патрабаванні заканадаўства. «У выніку - неаплачаныя падаткі, удар па бюджэце. А пакутуюць простыя пакупнікі. Сітуацыя надзвычай напалілася», - падкрэсліла прадпрымальніца.

У адказ на гэты эмацыйны выступ, які ўтрымлівала просьбу да Лукашэнкі, некаторыя ўдзельнікі форуму заявілі, што яны не згодныя прасіць уладу, але гатовыя патрабаваць ад дзяржавы скасавання спрэчнага ўказа «аб праве грамадзян Беларусі». Пасля гэтых слоў людзі ў зале ўсталі з месцаў і пачаў скандаваць: «Скасаванне!»

З 1 студзеня 2016 года ў Беларусі дзейнічае ўказ Лукашэнкі №222 «Аб рэгуляванні прадпрымальніцкай дзейнасці і рэалізацыі тавараў індывідуальнымі прадпрымальнікамі ды іншымі фізічнымі асобамі». Згодна з указам ІП павінны рэалізоўваць прадукцыю лёгкай прамысловасці, увезеную з краін Мытнага саюза, толькі з суправаджальнымі дакументамі. Аднак расейскія пастаўшчыкі, у якіх закупляюць тавар большасць беларускіх ІП, як правіла, адмаўляюцца выдаваць дакументы аб паходжанні прадукцыі альбо выдаюць фіктыўныя даведкі. У выніку ІП атрымліваюць штрафы, у іх канфіскуюць тавар.

Неаднаразовыя просьбы прадпрымальнікаў да ўладаў скасаваць указ пачутыя не былі. Таму ў першыя дні новага года ў Менску ды іншых гарадах Беларусі многія рынкі і гандлёвыя цэнтры практычна апусцелі - пераважная большасць ІП прыпыніла сваю працу праз немагчымасць выконваць патрабаванні ўказа.

Напісаць каментар 68

Таксама сачыце за акаўнтамі Charter97.org у сацыяльных сетках