Віцэ-прэм'ерка Качанава пачынае будаўніцтва катэджа ў Драздах

Дом чыноўніцы будзе каштаваць як сярэдні заробак беларуса за 175 гадоў.

У шэрагах жыхароў «Драздоў-2» чакаецца папаўненне. Зямлю пад будаўніцтва дома ў элітным катэджным пасёлку ў Менску атрымала віцэ-прэм'ерка Наталля Качанава.

Пачаць будоўлю Качанава яшчэ не паспела. Суседам стане банкір Аляксандр Ракавец, ягоны катэдж справа, nn.by.

Для чыноўніцы вылучылі надзел памерам блізу 15 сотак месяц таму, пастановай Менгарвыканкама № 3058 ад 13 кастрычніка 2016 года.

Нагадаем, зямля пад будаўніцтва катэджаў у Менску размяркоўваецца наступным чынам: спачатку яе павінны прапанаваць шматдзетным сем'ям з чаргі. Калі ахвотных няма, участак выстаўляецца на аўкцыён.

Ні ў якім прававым акце не сказана, што віцэ-прэм'ерка Наталля Качанава, якая прыехала ў Менск менш за два гады таму, мае першаснае права на будаўніцтва ў сталіцы.

З 1999 года ў Беларусі існуе спецыяльны службовы жыллёвы фонд. Быў складзены спіс чыноўнікаў, якім вылучаюцца кватэры або дамы на час працы на пэўнай пасадзе.

Качанава разам з сям'ёй жыла ў такім катэджы ў Наваполацку, калі працавала старшынёй гарвыканкама. Пасля ад'езду ў Менск дом трэба было вызваліць.

А вось катэдж у «Драздах-2» застанецца з Качанавымі назаўжды. Зямля вылучалася ў пажыццёвае спадчыннае валоданне.

Панарамнае фота, націсніце для павелічэння. Праз дарогу ад Качанавай дабудоўваецца спявак Анатоль Ярмоленка.

Сям'я Качанавых – гэта сама віцэ-прэм'ерка і ейны муж Леанід. Да пераезду ў сталіцу ён працаваў фізруком у Полацкім гандлёва-тэхналагічным каледжы. Абедзве дачкі выйшлі замуж, старэйшая гадуе дзіця.

Ва ўласнасці Наталлі Качанавай застаецца бацькоўская двухпакаёвая кватэра ў цэнтры Полацка.

Падчас крызісу ў Беларусі абваліліся кошты на нерухомасць. Цяпер за катэдж у Драздах складана атрымаць $1 мільён. У аб'явах пра продаж тамтэйшых дамоў часцей за ўсё пазначаныя $750 – 800 тысячаў. Аднак і гэта гіганцкія грошы. Дом Качанавай будзе каштаваць як сярэдні заробак беларуса за 175 гадоў.