Лідары апазіцыі заклікаюць захаваць санкцыі супраць Лукашэнкі

Дыктатар прывёў краіну ў тупік.

Апазіцыйныя палітычныя партыі і грамадска-палітычныя рухі Беларусі выступілі з сумесным зваротам да міжнароднай супольнасці.

Сайт charter97.org публікуе поўны тэкст заявы лідараў дэмакратычных сіл.

Зварот палітычных партый і грамадска-палітычных рухаў міжнароднай супольнасці

Нагадваючы, што кропкавыя візавыя і фінансавыя абмежаванні, уведзеныя Еўрапейскім Звязам, а таксама ЗША ў дачыненні да беларускіх чыноўнікаў, суддзяў, з'явіліся вынікам парушэнняў гэтымі людзьмі Канстытуцыі Беларусі і міжнародных абавязанняў Рэспублікі Беларусь;

Адзначаючы, што нягледзячы на некаторыя пазітыўныя тэндэнцыі, якія назіраюцца ў краіне цягам апошніх шасці месяцаў, сістэмных зменаў, скіраваных на якаснае змяненне сітуацыі ў галіне правоў чалавека, не адбылося;

Прымаючы пад увагу высновы і рэкамендацыі, якія змяшчаюцца ў выніковай справаздачы БДІПЧ АБСЕ аб прэзідэнцкіх выбарах у Беларусі, а таксама рэкамендацыі БДІПЧ АБСЕ ў пытанні паляпшэння якасці выбарчага заканадаўства і правапрымяняльнай практыкі;

Намагаючы, што галоўнай умовай паляпшэння якасці выбарчага заканадаўства і правапрымяняльнай практыкі з'яўляецца наяўнасць палітычнай волі беларускіх уладаў;

Нагадваючы, што важнай умовай нармалізацыі стасункаў з уладамі Беларусі было не толькі вызваленне палітвязняў, але і іх рэабілітацыя;

Мы, прадстаўнікі палітычных партый і грамадска-палітычных аб'яднанняў Беларусі, заклікаем Савет міністраў Еўрапейскага Звязу і ўрад ЗША:

1. Не скасоўваць візавыя і фінансавыя абмежаванні (санкцыі) у дачыненні да беларускіх чыноўнікаў, якія прымалі непасрэдны ўдзел у рэпрэсіях у дачыненні да палітычных апанентаў ці фальсіфікацыі вынікаў выбараў, і вярнуцца да разгляду гэтага пытання па выніках парламенцкай выбарчай кампаніі, якая пройдзе ў 2016 годзе.

2. Прыняць у фармаце заключэння і апублікаваць план першачарговых чаканых ад уладаў Рэспублікі Беларусь захадаў, накіраваных на прагрэс у галіне правоў чалавека (уключаючы рэгістрацыю палітычных партый, грамадскіх аб'яднанняў, спыненне пераследу журналістаў), а таксама стандартаў АБСЕ пры правядзенні выбарчых кампаній. Узгадніць з беларускімі ўладамі «дарожную карту» па імплементацыі такога плану, які павінен уключаць поўнае супрацоўніцтва з механізмамі ААН і АБСЕ.

3. Дамагацца ад беларускіх уладаў рэабілітацыі і аднаўлення ў правах вызваленых палітвязняў і вызвалення тых, хто праз палітычныя падставы знаходзіцца цяпер у турме.

4. Прапанаваць беларускім уладам да пачатку парламенцкай кампаніі выканаць асноўныя рэкамендацыі БДІПЧ АБСЕ, а менавіта:

4.1. Забяспечыць прыярытэтнае права палітычным партыям на ўключэнне ў выбарчыя камісіі ўсіх узроўняў па адным прадстаўніку, калі палітычная партыя прыняла пастанову аб удзеле ў выбарах.

4.2. Забяспечыць назіральнікам магчымасць аглядаць падлік галасоў такім чынам, каб бачыць змест кожнага бюлетэня (або адзнакі ў бюлетэні прагаласаваўшых грамадзян), атрымліваць любую інфармацыю, што датычыцца выбараў, а таксама фіксаваць працэс падліку галасоў наяўнымі ў іх распараджэнні сродкамі; даць назіральнікам права апячатваць выбарчыя скрыні подпісамі нароўні з сябрамі выбарчых камісій і атрымліваць копіі выніковых пратаколаў пасяджэнняў выбарчых камісій;

4.3. Забяспечыць на практыцы асобны празрысты падлік па кожным з відаў галасавання і па кожнай з выкарыстаных падчас галасавання скрыняў, дэманструючы кожны бюлетэнь кожнаму сябру выбарчай камісіі і назіральнікам. Акрамя таго, забяспечыць адлюстраванне вынікаў раздзельнага падліку галасоў у выніковым пратаколе.

4.4. Забяспечыць права судовага абскарджання любых пастаноў выбарчых камісій усіх узроўняў.

4.5. А таксама, у дадатак да рэкамендацый БДІПЧ АБСЕ, вызначыць падставы, якія даюць выключнае права на датэрміновае галасаванне і галасаванне па месцы жыхарства (дакументальна пацверджаная камандзіроўка, адпачынак, ад'езд на лячэнне, пацверджанне медыцынскай даведкай стану здароўя, якое перашкаджае выбаршчыку асабіста наведаць участак у асноўны дзень галасавання).

4.6 Забяспечыць публікацыю на сайце Цэнтральнай выбарчай камісіі інфармацыю аб выніках галасавання па выбарчых акругах у разрэзе кожнага выбарчага ўчастку.

Мы, прадстаўнікі палітычных партый і грамадска-палітычных аб'яднанняў Беларусі мяркуем, што спалучэнне пастаяннага маніторынгу, палітычнага ціску і аб'яднальнага дыялогу, які адкрывае прастору для грамадзянскай супольнасці, неабходнае для прагрэсу ў галіне правоў чалавека ў Беларусі.

Ірына Вештард, Беларуская сацыял-дэмакратычная партыя (Грамада)

Юрась Губарэвіч, рух "За свабоду"

Анатоль Лябедзька, Аб'яднаная грамадзянская партыя

Віталь Рымашэўскі, Беларуская хрысціянская дэмакратыя

Уладзімір Някляеў, рух за незалежнасць і дзяржаўнасць Беларусі

Мікалай Статкевіч, Беларуская сацыял-дэмакратычная партыя (Народная Грамада)

Станіслаў Шушкевіч, Беларуская сацыял-дэмакратычная Грамада

У каментары да гэтага дакумента лідар АГП Анатоль Лябедзька сказаў сайту ucpb.org:

«Дзяржавы, гатовыя галасаваць за поўнае скасаванне фінансавых і візавых абмежаванняў для беларускіх чыноўнікаў, аддаюць свой голас за масавы крадзеж галасоў выбарцаў падчас выбарчых кампаній, за тое, каб на тэлеэкранах працягвалі бессаромна хлусіць вучні Гебельса. Яны галасуюць, каб і далей у беларускіх судах былі пакоі катаванняў для журналістаў, каб чыноўнікі, суддзі, як і сёння, выціралі ногі аб Канстытуцыю і міжнародныя абавязанні Беларусі. Гэтыя дзяржавы, а дакладней іх кіраўнікі, хочуць рабіць свой брудны бізнэс з мясцовым кіраўніком, але гэта не мае нічога агульнага з бяспекай, з рынкавымі рэформамі, з пераменамі ў Беларусі.

Лукашэнка прывёў краіну ў тупік. Беларусь мае патрэбу ў інвестыцыях у пераменах, а не ў дапамозе закансерваваць сітуацыю».

Зварот быў перададзены прадстаўнікам міністэрстваў замежных спраў краін Вышаградскай групы (Вугоршчыне, Польшчы, Славакіі, Чэхіі), а таксама Аўстрыі, Вялікабрытаніі і Нямеччыне, якія 9-10 лютага знаходзяцца ў Менску.