Барыс Жаліба: Нас можа чакаць дэфолт

Беларусь можа застацца без золатавалютных рэзерваў.

Экспэрты расейскага «Ашчадбанка» ўважаюць золатавалютныя рэзервы Беларусі за «крытычна нізкія». Расейскія аналітыкі забілі трывогу, бо за студзень золатавалютныя рэзервы нашай краіны знізіліся на 3,6% (на 149 мільёнаў даляраў) - да 4 мільярдаў даляраў, піша «Салідарнасць».

- З іх ацэнкай нельга не пагадзіцца. Ёсць жа міжнародныя нормы: золатавалютныя рэзервы павінны быць не меншыя за двух-, а лепш трохмесячны імпарт тавараў і паслуг у краіну. А нашы золатавалютныя рэзервы апошнім часам складаюць толькі прыкладна паўтара месяца імпарту. Прыкладна такая ж сітуацыя была вясной 2011 года пры наймацнейшым валютным крызісе, - сцвярджае доктар эканамічных навук Барыс Жаліба.

- Больш за тое: мы можам наогул без золатавалютных рэзерваў застацца. Мы маем адмоўны гандлёвы баланс, трэба чымсьці кампенсаваць адмоўнае валютнае сальда.

І яшчэ важны момант. У структуры золатавалютных рэзерваў Беларусі ёсць і манетарнае золата (зліткі), і каштоўныя камяні, і валюта МВФ СДР, прызначаная для спецыяльных разлікаў. Ліквідных валют, якія выкарыстоўваюцца для выплаты запазычанасцяў дзяржавы, з 4 млрд даляраў у нас толькі прыкладна 2,2 млрд. (А сёння, можа, ужо і менш). Пры гэтым у гэтым годзе па вонкавым запазычанасцям нам яшчэ трэба выплаціць Расеі, Кітаю і Еўразійскаму фонду стабілізацыі і развіцця парадку 1,7-1,8 млрд даляраў.

А сакавік ужо на парозе, таму наша кіраўніцтва напружана чакае 2 млрд даляраў крэдыту Пуціна. Калі ён іх не дасць, нас можа чакаць дэфолт. Думаю, грошы ён выдасць, каб не дапусціць банкруцтва ледзь не адзінага хаўрусніка, але на нервах пагуляе, - мяркуе эканаміст.