Лявон Баршчэўскі: Дзень беларускай вайсковай славы - 8 верасня

На думку грамадскага дзеяча, для беларусаў няма ніякай станоўчай гістарычнай традыцыі ў 23 лютага.

Грамадскі дзеяч і былы дэпутат Вярхоўнага Савета Беларусі Лявон Баршчэўскі распавёў у інтэрв'ю "Радыё Рацыi" аб тым, ці трэба ўважаць 23 лютага Днём абаронцаў Айчыны:

Для мяне гэты дзень - адназначна не свята. Я нават, калі вучыўся ў школе ў савецкія часы, адмаўляўся 23 лютага прымаць падарункі і казаў: "Я тут пры чым?" А тым больш цяпер, калі Саюза ўжо няма. Святкаваць падзею, калі немцы ўзялі Пскоў, - гэта толькі хворае ўяўленне бальшавікоў магло прыдумаць.

- Аднак, святкаванне 23 лютага стала для многіх людзей ужо традыцыяй.

- Навязаць можна ўсё. Калі праз СМІ гадамі забіваць у галаву, што ў той ці іншы дзень трэба адзначаць тую ці іншую дату, то прывыкаюць. Святкаванне 23 лютага - гэта абсалютна прапагандысцкі прыём і выдумка. Ніякая савецкая войска не ўзнікла 23 лютага 1918 года. А да Беларусі гэта ўвогуле не мае ніякага дачынення.

- На ваш погляд, калі правесці апытанне сярод беларусаў, то ці ведаюць яны, чаму менавіта 23 лютага адзначаецца Дзень абаронцаў Айчыны?

- Думаю, большасць не ведае, гэтак жа, як пра 1 траўня ці 7 лістапада. Зрэшты, людзі не ведаюць і больш відавочныя рэчы.

- Можа быць, трэба было б тады з гэтай нагоды прызначыць нейкае сваё нацыянальнае свята?

- У Вярхоўным Савеце 12-га склікання мы ставілі пытанне, каб 8 верасня адзначаўся Дзень вайсковай славы, але большасць дэпутатаў не пагадзілася на гэта. Баяліся рэакцыі з боку Расеі, так 8 верасня 1514 гады войска Вялікага княства Літоўскага разграміла пад Оршай маскоўскія войскі. Былі прапановы і аб 7 ліпеня, бо менавіта ў гэты дзень у 1944 годзе ў Менску быў вялікі партызанскі парад. Тады было проста ўражлівае шэсце, і, калі б адзначалі Дзень абаронцаў Айчыны ў гэты дзень, то такі падыход больш-менш усіх задаволіў бы. Але сёння маем тое, што маем. Паўтаруся, для беларусаў ніякай станоўчай гістарычнай традыцыі за гэтым днём няма.