Апазіцыя прадставіць Беларусь на Еўранэсце, «дэпутаты» «палаткі» не запрошаныя

Пасяджэнне рабочай групы аб Беларусі адбудзецца 22 сакавіка ў Брусэлі.

Прадстаўнікі дзевяці беларускіх апазіцыйных структур, Беларускай сацыял-дэмакратычнай партыі (Грамада), руху «За Свабоду», Аб'яднанай грамадзянскай партыі, аргкамітэта для стварэння партыі «Беларуская хрысціянская дэмакратыя», Партыі БНФ і іншых, возьмуць удзел у мерапрыемствах парламенцкай асамблеі Усходняга партнёрства (Еўранэст), якія пройдуць 21-23 сакавіка ў Брусэлі.

Пасяджэнне рабочай групы аб Беларусі адбудзецца 22 сакавіка.

Як паведаміў БелаПАН сустаршыня БХД Віталь Рымашэўскі, «ёсць вялікі шанец, што большасць беларускіх апазіцыйных структур выступяць з адзіным пасланнем».

«Мы распрацоўваем супольнае пасланне да палітыкаў Еўропы, яно тычыцца правядзення «парламенцкіх выбараў» у гэтым годзе. Мы мяркуем, што акцэнт павінен рабіцца на ўмовах іх правядзення і адпаведнасці іх стандартам АБСЕ. Іншыя акцэнты будуць толькі выгадныя беларускім уладам, будуць садзейнічаць кансервацыі сітуацыі ў краіне і фальсіфікацыі «выбараў», - сказаў ён.

Рымашэўскі адзначыў, што на пасяджэнне не запрошаныя «дэпутаты» «палаткі». «Еўрапарламентарыі наважылі іх не запрашаць. Спадзяюся, такая іх пазіцыя захаваецца як мінімум да «парламенцкіх выбараў», - сказаў ён.