Памёр беларускі тэлерэжысёр і прадусар Уладзімір Ісат

Рэжысёр апошнія гады працаваў ва Украіне.

У ноч на нядзелю памёр вядомы беларускі тэлевізійны рэжысёр Уладзімір Ісат, паведамілі БелаПАН ва ўкраінскай кампаніі FILM.UA Grouр, дзе ён апошнім часам працаваў.

«Так, на жаль, гэта праўда», - сказала прадстаўнік FILM.UA Grouр Алёна Старадубава.

Уладзімір Ісат нарадзіўся ў 1956 годзе ва Уладзівастоку. Скончыў Ленінградскі дзяржаўны інстытут тэатра, музыкі і кінематаграфіі, доўгі час працаваў на беларускай тэлевізіі, у Белтэлерадыёкампаніі. У 2006 годзе разам з калегай Надзеяй Гаркуновай за навагодняе тэлевізійнае шоў «У гасцях у Дзеда Мароза» ўзяў «Тэлевяршыню» як найлепшы рэжысёр.

На Украіне працаваў сцэнарыстам і рэжысёрам. Пры яго ўдзеле выйшлі серыялы «Сэрцу не загадаеш», «Суседзі», «Дарога ў пустэчу», «Пастка», «Жаночы доктар», «Жаночы доктар-2» і іншыя.

Пахаваюць Уладзіміра Ісата ў аўторак, 21 чэрвеня, у Менску. Украінская Студыя FILM.UA рыхтуе транспарт для паездкі ў беларускую сталіцу, каб усе ахвочыя развітацца з прадусарам, змаглі гэта зрабіць.

charter97.org далучаецца да шматлікіх спачуванні родным і блізкім Уладзіміра Ісата.