Някляеў: У Беларусі не парламенцкія выбары, а парламенцкія прызначэнні

Уладзімір Някляеў звярнуўся да дэлегатаў «усебеларускага сходу» з заклікам прапанаваць адкласці «парламенцкія выбары».

«У 2010 годзе за тое, каб я стаў дэлегатам «усебеларускага народнага сходу», падпісаліся больш за 20 000 грамадзян Рэспублікі Беларусь. Такога прадстаўніцтва не было ні ў аднаго іншага дэлегата - і тым не менш дэлегатам мяне не зарэгістравалі. Дэлегатамі «народнага сходу» сталі не тыя, каго выбраў народ, а тыя, каго прызначыла ўлада», - напісаў Уладзімір Някляеў на сваёй старонцы ў Facebook.

«Не трэба хаваць, народ нічога ў нас не вырашае. Вырашаюць за яго. І калі нешта ў нашай краіне трэба змяніць у першую чаргу, то менавіта гэта. Вярнуць народу права выбару, без чаго ні з палітычнага, ні з эканамічнага тупіка нам не выйсці», - працягнуў Някляеў.

З яго слоў, права выбару павінна быць забяспечана тут жа: на найбліжэйшых «выбарах у парламент».

«І тут важкае слова можаце сказаць вы, дэлегаты «ўсебеларускага сходу», калі хто-небудзь з вас прапануе ўнесці ў парадак дня пытанне «парламенцкіх выбараў».

«Парламенцкія выбары», прызначаныя на 11 верасня, трэба адкласці. Іх нельга праводзіць так, як плануе ўлада. А плануе яна не парламенцкія выбары, а парламенцкія прызначэнні. Як гэта было і на мінулых «выбарах», і на леташніх, калі ў «парламент» прызначаліся цалкам залежныя ад улады людзі, якія нічога не вырашалі.

Сёння час вырашаць. Сітуацыя такая. Палітычная, эканамічная. Краіна на мяжы страты незалежнасці. Гэта цвяроза трэба ўсведамляць - і шукаць выхад», - піша палітык.

На яго думку, крок да яго - дзеяздольны парламент. Дэпутацкі корпус, здольны ўзяць на сябе адказнасць за будучыню Беларусі.

«Я не пра тое, што выбрацца ў парламент павінна мець магчымасць дэмакратычная апазіцыя. Вядома, павінна. Але перш за ўсё ў краіне павінны быць створаны такія ўмовы, каб у парламент, а гэта значыць у палітыку пайшлі разумныя, дасведчаныя, адказныя людзі, якія сёння палітыкі цураюцца. І не таму, што не жадаюць ёй займацца, і нават не таму, што баяцца: маўляў, працу, маёмасць адбяруць, пасадзяць. Многія рызыкнулі б і працай, і маёмасцю, і нават свабодай. Але разумеюць: без толку. У «парламенце» іх не будзе. Туды прызначаць іншых. Тых, хто будзе націскаюць так, як ім скажуць, кнопкі, і падымаць тады, калі трэба, рукі», - адзначыў Уладзімір Някляеў.

Ён распавёў, што б зрабіў, калі б сам стаў дэлегатам «усебеларускага сходу».

«Я б скарыстаўся гэтым, каб прапанаваць адкласці «парламенцкія выбары», бо краіна да іх не гатовая, склікаць пазачарговую сесію «палаты прадстаўнікоў нацыянальнага сходу» і ўнесці ў заканадаўства змены, якія б гарантавалі правядзенне выбараў свабоднымі і справядлівымі. Гэта рэальны крок да сапраўднага, а не цацачнага парламенту, да жыццёва неабходных палітычных і эканамічных рэформ. Гэта шлях да захавання Беларусі, яе дзяржаўнасці і незалежнасці. Гэта гістарычны шанец - і я б на вашым месцы яго не выпусціў», - рэзюмаваў палітык.