Знайшоўся развітальны верш беларускага паэта, які загінуў у Менску

Старшыня беларускага ПЭН-цэнтру Андрэй Хадановіч апублікаваў апошні верш паэта Ігара Канановіча, які загінуў 19 чэрвеня ў Менску.

Ігар Канановіч зваліўся з даху будынка ў раёне Кастрычніцкай плошчы. Прычыны падзення пакуль невядомыя.

Андрэй Хадановіч піша ў Facebook, што верш ён атрымаў ад Канановіча некалькі дзён таму.

Правільны пасыл

Патрэбны спакой.

І кропелька ўдачы.

Каб перайначыць

гэты, пакуль што сабачы,

лёс.

Я сур'ёзна падрос,

і мне цісне каўнерык дзіцячы...

Ціснуць маміны "звышзадачы":

служы паспяховаму гаду,

старэйшага слухай параду,

не лезь у вялікую зваду...

Of course!..

Патрэбны прасцяг. І кропелька Сонца.

А не навінаў ментальны стронцый!

Я стаміўся ўдзельнічаць у гэтай гонцы!

Так, ідзіце вы на..уй, бос!