Мікалай Казлоў: Яны на 100% падрыхтавалі глебу для фальсіфікацый

Фармаванне ўчастковых камісій да «выбараў» ідзе так, каб туды не патрапіў ніводзін «выпадковы» чалавек.

Пра тое, як ідзе фармаванне ўчастковых камісій, сайту ucpb.org распавёў старшыня Менскай арганізацыі Аб'яднанай грамадзянскай партыі Мікалай Казлоў, вылучаны кандыдатам ад Старавіленскай выбарчай акругі №105.

АГП вылучыла ва ўчастковыя камісіі ў гэтай акрузе больш за 40 кандыдатаў. Кандыдатам ад яе ідзе Мікалай Казлоў, старшыня Менскай гарадской арганізацыі АГП, афіцэр, падпалкоўнік у запасе, опер крымінальнага вышуку ў асабліва важных справах.

Гэта менавіта ён, ахоўваючы парадак на ўчастку ў 2008 г, спрабаваў прадухіліць парушэнне закона старшынём участковай камісіі Аляксеем Пятніцай, які ўвайшоў у апячатаны пакой і ўкінуў у скрыню для галасавання пачак бюлетэняў. Падпалкоўнік Мікалай Казлоў напісаў пра гэта рапарт начальству, а калі захады ўжытыя не былі, паведаміў у незалежную прэсу. Неўзабаве сышоў у запас.

Мікалай Казлоў быў сёння на паседжанні для фармавання ўчастковых камісій і распавёў праз тэлефон пра тое, што там адбывалася:

- Гэта немагчыма ўспрымаць без смеху. Пасяджэнне праходзіць так. Дакладчык называе прозвішча кандыдата ў члены камісіі і партыю, ад якой грамадзянін вылучаецца, і пытаецца: «Хто хоча выступіць?»

Кожны з прысутных зазірае ў спіс перад ім. Усе пераглядаюцца: у каго? Нарэшце, адзін знаходзіць: «Я хачу выступіць» і зачытвае характарыстыку на грамадзяніна: «Год нараджэння такі. Выканаўчы, адказны, руплівы, удзельнічае ва ўсіх мерапрыемствах, выконвае ўсе, што яму даручана...» Ідзе поўная аналогія са Шцірліцам і «17-цю імгненнямі вясны»: «бязлітасны да ворагаў рэйху. Сувязяў, якія ганьбуюць яго, не меў»...

Гэта ўсё прадаўжаецца жудасна доўга - яны зачытваюць манатонным голасам дзясяткі і сотні такіх маркотных характарыстык...

Я выступіў з прапановай спыніць балаган: гэта прадаўжаецца ўжо 2 гадзіны, але цалкам відавочна, што ў выніку цудоўным чынам старшынём камісіі і намеснікам апынуцца тыя ж, хто займае гэтую пасаду ўжо 15 гадоў, а ў камісію ўвойдуць людзі, якія з дзіўнай выпадковасці выявяцца членамі аднаго працоўнага калектыву, які знаходзіцца - бывае ж супадзенне! - у падначаленні ў гэтага самага старшыні або намесніка. Хоць вылучаныя ўсе яны, вядома, будуць зусім рознымі партыямі тыпу спартыўнай і грамадскімі арганізацыямі тыпу ветэранскіх.

Аднак усё гэта прадаўжаецца.

Сяброў АГП, вядома, не ўключылі. Некаторых запрасілі на сумоўе, якое нечакана выявілася...іспытам на веданне выбарчага кодэкса! Прычым «экзаменатар» задаваў пытанні, чытаючы ўвесь тэкст з брашуры... Увогуле, ні экс-прарэктар БДУ Анатоль Паўлаў, ні вядомы палітык, які мае дыплом юрыста з адзнакай Аляксандр Дабравольскі «экзамен» «не здалі». Хто б сумняваўся!

Большую частку нашых вылучэнцаў нават не запрасілі: «не датэлефанаваліся». Неяк тэлефоны ў іх не тыя выявіліся... Ну, дык спытайце ў нас - я вам дам тэлефоны або прывяду адразу ўсіх 40 чалавек сюды... Увогуле, усё шытае белымі ніткамі. Вядома ж, уся гэтая - абсалютна незаконная - працэдура была прыдуманая спецыяльна для АГП. Бо той, хто трапляе ў склад камісіі, не абавязаны ведаць выбарчы кодэкс. Усё, што трэба яму ведаць, ён атрымлівае на спецыяльным трэнінгу плюс спецыяльная брашура.

Другая мая прапанова была не ўключаць у камісіі тых, хто ўжо двойчы і больш разоў удзельнічаў у працы выбарчых камісій, бо выбарныя кампаніі не былі прызнаныя міжнароднымі назіральнікамі ні сумленнымі, ні адкрытымі.

Дарэчы, назіральніца ад СНД была ў пачатку сённяшняга пасяджэння. Думаю ёй усё зразумела, але ці скажа яна гэта, не ведаю.

Усё гэта - і сум, і весялосць адначасова. Чысты «савок», «член партыі з такога году, сувязяў, якія ганяць яго, не меў». Але сумна - таму што гэта пасяджэнне з усёй відавочнасцю прадэманстравала, што нічога яны змяняць не збіраюцца, само фармаванне камісій ідзе так, каб туды не патрапіў ніводзін «выпадковы» чалавек. Яны на 100% падрыхтавалі поле для фальсіфікацый. Гэта відаць няўзброеным вокам.

Нагадаем, лідары беларускай апазіцыі заявілі аб тым, што не будуць вылучаць свае кандыдатуры на так званых «выбарах».