Знесены ў Кобрыне помнік Сувораву вернуць на месца пасля рэстаўрацыі

Помнік у суботу знёс кіроўца мясакамбіната.

Помнік Сувораву ў Кобрыне, які 17 верасня выпадкова знёс кіроўца мясакамбіната, вернуць на ранейшае месца, паведаміла tut.by дырэктар кобрынскага вайскова-гістарычнага музея Алена Бабенка.

Як удакладнілі ў музеі, сам бюст палкаводца не пацярпеў. Аднак у выніку інцыдэнту пашкодзіўся пастамент і каменныя пліты ля месца, дзе ён быў усталяваны.

«Рамонт трэба будзе дастаткова сур'ёзны, але сам помнік не пацярпеў», - паведаміла дырэктар музея Алена Бабенка.

Да нядаўняга часу ў Кобрыне было тры помнікі Сувораву. Знесены бюст быў усталяваны ў 1950 годзе. Гэта бронзавая копія скульптурнага партрэта, які быў выкананы ў 1901 годзе мастаком Кюферле.

Калі Сувораў «вернецца» на ранейшае месца, пакуль не вядома. На гэты момант помнік захоўваецца на тэрыторыі музея-сядзібы ім. Суворава.

Аляксандр Сувораў (1729-1800) - расейскі палкаводзец, які ў гісторыю Беларусі ўвайшоў актыўным удзелам у крывавым падаўленні вызваленчых Барскай канфедэрацыі ў 1768-1772 гадах і паўстання пад кіраўніцтвам Тадэвуша Касцюшкі ў 1794 годзе. За падаўленне апошняга ён быў падараваны Кобрынскай воласцю з больш чым 13 тысячамі мужчынскага насельніцтва. Супраць ягонага ўшанавання ў Беларусі актыўна выступаюць нацыянальна-арыентаваныя сілы.