Сіноптыкі: На гэтым тыдні захаваецца марознае надвор'е
- 16.01.2017, 11:30
- 15,102
Надвор'е на гэтым тыдні будзе ўмерана марозным, практычна без ападкаў.
Першую палову тыдня ўмовы надвор'я на тэрыторыі Беларусі будзе вызначаць вобласць павышанага атмасфернага ціску, сфармаваная ў халоднай вільготнай паветранай масе. Слупкі тэрмометраў будуць паўзці ўніз, і толькі ў чацвер крыху пацяплее. Пра гэта tut.by распавёў начальнік службы метэаралагічных прагнозаў Рэспубліканскага цэнтра гідраметэаралогіі Дзмітрый Рабаў.
У аўторак, 17 студзеня, у асобных раёнах невялікі снег. Уначы і раніцай у асобных раёнах туман, шэрань. На асобных участках дарог галалёдзіца. Тэмпература ўначы -4 .. -10°С, пры праясненнях -11... -13°С, удзень -2.. -8°С.
18 студзеня будзе пераважна без ападкаў. У асобных раёнах рэспублікі слабы туман, шэрань, на дарогах галалёдзіца. Тэмпература ўначы -8...-15 °С, пры праясненнях да -18°С; удзень -4... -9°С.
У ноч на Вадохрышча чакаецца ўмерана марознае надвор'е: уначы -5.. -11°С, на паўднёва-ўсходняй палове -12... -16°С, пры праясненнях да -18°С; удзень ад 0 на паўночным захадзе да -7°С на поўдні. Уначы ў крайніх паўночных раёнах невялікі снег. Удзень пераважна на паўночнай палове рэспублікі кароткачасовыя ападкі (снег, мокры снег, на паўночным захадзе, удзень з дажджом), слабыя туман і галалёд. На асобных участках дарог галалёдзіца.
Далей уладу над надвор'ем возьме Атлантыка, і ў Беларусь зноў накіруецца сагрэтае Гальфстрымам цёплае і вільготнае паветра, і тэмпература пачне павышацца, цяплей будзе на поўначы, халадней на поўдні краіны.
У пятніцу ў асобных раёнах рэспублікі кароткачасовыя ападкі (мокры снег, дождж), слабы туман і галалёд, на дарогах галалёдзіца. Тэмпература паветра ўначы -1.. -8°С, пры праясненнях на паўднёвым захадзе да -11°С; максімальная ўдзень -5.. +2°С.